Babəlioğlu C.

Sevda Ələkbərzadənin “Şəbu hicran”ı

Müğənni albomunu möhtəşəm təqdimat düzənləyib

Həftə sonu Sevda Ələkbərzadə "Şəbu-Hicran" adlı albomunu təqdim etmək üçün sənətsevərləri başına topladı. İki ilə ərsəyə gələn bu albomun yolunu mətbuat işçiləri ilə müğənni özü də həsrətlə gözlədiyini söylədi. Müğənni gələn qonaqları albomda yer almış mahnıları ilə salamladı. Konsert zamanı Sevdanı Natiq ritm qrupu ilə yanaşı, "Bəri bax" vokal qrupu da müşaiyət edirdi. Toplunun üzərində 20-dən çox musiqiçi çalışıb. Albom 12 mahnıdan ibarət CD şəklində işıq üzü görüb. Bundan əlavə, albomda Müslüm Maqomayev adına Dövlət Filarmoniyasında keçirilən "Şəbu hicran" adlı solo-konsertinin DVD versiyası yer alıb. Diskdə bəstəkarlardan Fikrət Əmirovun, Cahangir Cahangirovun, Tələt Eyyubovun bəstələri ilə yanaşı, xalq mahnıları da yeni oranjimanda təqdim olunub. Sevda CD-yə daxil olan mahnıların Azərbaycan Dövlət Filarmoniyasının studiyasında yazıldığını söylədi. Azərbaycanda ilk dəfə olaraq, həm görünüş, həm səslənmə, həm də keyfiyyət baxımından fərqlənən, xaricdə hazırlanmış bu diskin dizaynının Flexible Solutionsa məxsus olduğunu bildirib. Qeyd edək ki, SD və DVD-də yer alan kitabçada isə tənqidçi Cahangir Səlimxanovun Sevda Ələkbərzadənin musiqi dünyasından bəhs etdiyi yazı 5 dildə - Azərbaycan, rus, ingilis, fransız və alman dillərinə tərcümə olunaraq, topluya daxil edilib. Xatırladaq ki, iş adamı Nazim Abdullayevin dəstəyi ilə işıq üzü görən "Şəbu hicran" albomu 3000 tirajla buraxılıb və Avropa ölkələrində də satışa çıxarılacaq.

Yeni Azərbaycan.- 2007.- 30 yanvar.- S. 8.