Lətif Kərimov yad edilib

Azərbaycan xalçaçılıq sənətini bütün dünyaya tanıdan Xalq rəssamı Lətif Kərimov yad edilib. Sənətkarın adını daşıyan Azərbaycan Xalçası və Xalq Tətbiqi Sənəti Muzeyində "İlmələrdə yaşayan ömür" adı altında keçirilən tədbirdə Xalq rəssamının Azərbaycan xalçaçılıq sənətinin inkişafındakı əvəzsiz xidmətlərindən bəhs olunub.

Azərbaycan Xalçaçılıq və Xalq Tətbiqi Sənəti Muzeyinin direktoru Röya Tağıyeva Lətif Kərimov kimi şəxsiyyətlərin yetərincə təbliğ olunmasının və gənclərə tanıdılmasının vacib olduğunu söyləyib. Məhz bu səbəbdən kollektiv tədbirə Rəssamlıq Akademiyası, İncəsənət Gimnaziyası və Bakı Mədəni-Maarif Texnikumunun tələbələrini də dəvət ediblər. Tədbirin sonunda iştirakçılara "Lətif Kərimov fenomeni" adlı iki cildli kitab və xalça ustadına həsr edilmiş "Ömrün naxışları" adlı film nümayiş etdirilib.

Kaspi.- 2007.- 20 noyabr..- S. 17.