Əliyev H.

Azərbaycan Respublikasının Prezidenti zati-aliləri cənab İlham Əliyevə

Hörmətli cənab Prezident!

Dövlətimizin ən ali mükafatlarından olan "İstiqlal" ordeni ilə təltif olunmağım məni son dərəcə fərəhləndirdi və ilk növbədə, əməyimə verdiyiniz bu böyük qiymətə görə Sizə minnətdarlığımı bildirirəm.

Sənətin və sənətkarın vəzifəsi dünyanı daha gözəl etməkdir və sənətkar fərəhlənməsə, yarada bilməz.

Mən xoşbəxt taleli sənətkaram ki, qismətimə sənəti dərindən duyan və yüksək qiymətləndirən, sənətkarı əziz tutan və nəvaziş göstərən ümummilli lider Heydər Əliyev kimi dahi insanın, onun şərəfli yolunu ləyaqətlə davam etdirən İlham Əliyev kimi üstün bir rəhbərin müasiri olmaq düşdü.

Mən illər boyu xalqın məhəbbəti ilə yanaşı, dövlət rəhbərinin daimi diqqətini, qayğısını duymuşam və bu məni fərəhləndirib, qanadlandırıb, daha artıq çalışmağa, daha artıq yaratmağa, millətimə və dövlətimə daha yaxşı xidmət göstərməyə səfərbər edibdir.

Muğamlarımız, xalq musiqimiz həyatımın ayrılmaz parçasıdır, ömrümün mənasıdır və ona görə də əsrlərin sınağından keçib gəlmiş bu sərvətlərin taleyi məni hər zaman düşündürübdür.

Ömrümün bu çağında xalq musiqimizə, bütövlükdə mədəniyyətimizə göstərilən müstəsna dövlət qayğısının hər an şahidi olduqca, ürəyim iftixar hissi ilə dolur.

Mən indi bu əziz sərvətlərimizin gələcəyindən arxayınam, onların daha da tərəqqi edəcəyinə əminəm. Sizin bu xidmətləriniz ən yüksək təriflərə və alqışlara layiqdir.

Hörmətli cənab Prezident!

Bir daha sənətimə və şəxsiyyətimə verdiyiniz çox yüksək qiymətə görə Sizə ən dərin minnətdarlıq hisslərimi ifadə edir, Vətənimizin, dövlətimizin çiçəklənməsi yolundakı yorulmaz fəaliyyətinizdə Sizə uğurlar arzulayıram.

Azərbaycan.- 2007.- 23 oktyabr.- S. 4.