Bakıda Birinci Beynəlxalq "Qızıl payız" musiqi festivalı davam edir

Qızıl payız yarpaqları ilə bəzədilmiş, kövrək yağış ovqatı yaradan çətirlər döşənmiş səhnə. Bu romantik mənzərəni bir duyğu yağışı kimi izləyən Vaqif Mustafazadə melodiyalarının həzin sədaları və Bakı görüntüləri... Bir də Beynəlxalq "Qızıl payız" musiqi festivalının ikinci günü.

Oktyabrın 5-də Teatr Xadimləri İttifaqının tamaşa salonunda Azərbaycan Mədəniyyətinin Dostları Fondu, Mədəniyyət və Turizm, Gənclər və İdman nazirliklərinin təşkilatçılığı ilə birinci Beynəlxalq "Qızıl payız" musiqi festivalı davam etdirilmişdir.

Musiqi bayramının ikinci günü tamaşaçılar "Kamerata" (Belarus) vokal qrupunun akapella musiqi kompozisiyası ilə tanış olmuşlar.

Qrup özünəməxsus orijinal improvizasiya, caz, estrada və folklor ünsürlərindən məharətlə istifadə edərək, rəngarəng proqram nümayiş etdirmişdir. Belaruslu musiqiçilərin həzin, payız ovqatlı, lirik, emosional çıxışları alqışlarla qarşılanmışdır.

Bundan sonra səhnəyə çıxan "Man Sound" (Ukrayna) vokal qrupunun ifası da alqışlarla qarşılanmışdır.

Bu qrup qərb dünyasının mötəbər festivallarında mükafata layiq görülmüş, Rusiya, Hollandiya, İsveç, Norveç və ABŞ-da qastrol səfərlərində olmuşdur.

Hələ keçmiş SSRİ məkanında öz dəsti-xətti ilə seçilən, dünyanın bir çox vokal qrupları ilə rəqabətə girə bilən bu kollektivin ifa etdiyi caz, folklor və estrada musiqisi Bakı tamaşaçıları tərəfindən hərarətlə qarşılanmışdır.

Beynəlxalq "Qızıl payız" musiqi festivalı oktyabrın 6-da Müslüm Maqomayev adına Azərbaycan Dövlət Filarmoniyasında davam etdiriləcəkdir.

Respublika.- 2007.- 6 oktyabr.- S. 6.