Rzalı R.

Beynəlxalq Kulinariya bayramı qeyd olundu

Ötən gün dünyanın yüzdən çox ölkəsi ilə bərabər Azərbaycan kulinarları da Beynəlxalq Kulinariya bayramını qeyd etdilər. Mədəniyyət və Turizm Nazirliyinin rəhbərliyi ilə keçirilən bayram mərasimində ölkəmizdə fəaliyyət göstərən xarici ölkələrin səfirliklərinin, beynəlxalq qurumların nümayəndələri və restoranlarda işləyən əcnəbi aşpazlar iştirak edirdilər. Milli mətbəximizə heyranlıqlarını gizlətməyən əcnəbi aşpaz ustalar meyvələr və bostan bitkiləri üzərində işlənmiş fantaziyalara heyranlıqla tamaşa edirdilər. Fidan Vəliyeva və Emin Qurbanovun qarpız, yemiş, balqabaq və başqa bitkilər üzərində yaratdıqları qəhrəman və göldə üzən sonalar obrazları bayram sərgisinin bəzəyi idi.
Bayram mərasimini mədəniyyət və turizm naziri Əbülfəs Qarayev açaraq ilk dəfə dövlət səviyyəsində qeyd olunan kulinariya bayramı münasibətilə milli kulinarlarırmızı təbrik etdi və nümayişə çıxarılan əl işlərinə heyranlığını bildirdi. Nazir məşhur aşpaz usta Şahhüseyn Kərimovun 60 illik yubileyini də diqqətə çəkərək ona nazirliyin hədiyyəsini təqdim etdi. Ə.Qarayev qeyd etdi ki, üzümüzə gələn Novruz bayramında Milli Kulinariya Mərkəzinin rəhbərliyi ilə şimal bölgəsində kulinariya festivalı keçiriləcək.
Milli Kulinariya Assosiasiyasının prezidenti Tahir Əmiraslanov tədbirə toplaşanlara dərin minnətdarlığını bildirdi və dünyanın yüzə qədər ölkəsində müsabiqələrdən qızıl medallarla dönən yerli ustalarımızın əl qabiliyyətindən danışdı. Sonra onun ideyası əsasında Rasimə Əhmədovanın quruluşunda ilk dəfə "İncilər" ansamblı tərəfindən hazırlanmış "Yuxayayanlar" etnoqrafik mətbəx rəqsi ifa olundu. Bu, mətbəx mədəniyyəti silsiləsindən hazırlanan ilk milli rəqs idi. T.Əmiraslanov bildirdi ki, bu yönümdə bir sıra rəqslərin hazırlanması istiqamətində iş gedir.
Bayram mərasiminin bədii hissəsində milli rəqslərimiz ifa olundu, mahnılar səsləndirildi.

Azərbaycan.-2007.-21 oktyabr.-S.8.