Bakıda Rusiya fotorəssamlarının "Moskva gəzintisi" adlı sərgisi açılmışdır

Bakıda Moskva Mədəniyyəti Günləri çərçivəsində oktyabrın 3-də Səttar Bəhlulzadə adına Mərkəzi Sərgi Salonunda Rusiya fotorəssamlarının "Moskva gəzintisi" adlı sərgisi açılmışdır.

Mədəniyyət və Turizm Nazirliyinin, Moskva Hökuməti Mədəniyyət Departamentinin və Mərkəzi Sərgi Salonunun təşkilatçılığı ilə keçirilən tədbirdə 10-na yaxın fotorəssamın 60-dan artıq əsəri nümayiş etdirilir.

Sərgidə Rusiyada və MDB ölkələrində ən qocaman agentliklərdən biri İTAR-TASS-ın fotoxronikasındakı işlər təqdim olunur. Müxtəlif janrlarda işlənilməsinə baxmayaraq fotoların mövzusu birdir. Onlarda Moskvanın təkrarolunmaz, özünəməxsus memarlığına, təbiətinə və sakinlərinə olan sevgi öz əksini tapmışdır. Bakılılar bu əsərlər vasitəsilə Rusiya paytaxtının müasir siması ilə də tanış olmaq imkanı qazanmışlar.

Azərbaycan və Rusiya paytaxtları arasında sıx mədəni əlaqələrin mövcud olduğunu vurğulayan Mədəniyyət və Turizm naziri Əbülfəs Qarayev Bakıda Moskva Mədəniyyəti Günlərinin keçirilməsini 2007-ci ilin əhəmiyyətli hadisələrindən biri kimi dəyərləndirmişdir. Ötən il Rusiyada Azərbaycan İlinin uğurla keçirildiyini diqqətə çatdıran nazir, bu tədbirin də onun davamı olduğunu bildirmişdir. Demişdir ki, ölkələrimiz arasında mədəni əlaqələrin möhkəmləndirilməsində və genişləndirilməsində belə tədbirlərin əhəmiyyəti böyükdür.

Sonra sərgiyə baxış keçirilmişdir.

Respublika.-2007.- 4 oktyabr.- S. 8.