Tapdıq G.

Azərbaycanda Moskva Mədəmiyyət Günləri başladi.

Mədəniyyət günlərinə Moskva gəzintisi ilə start verildi

Əbülfəs Qarayev sərgidə 10 fotoqrafın Moskvanı əks etdirən 70 foto əsərinin nümayiş olunduğunu deyib.

Dünən Səttar Bəhlulzadə adına Mərkəzi Sərgi Salonunda “Azərbaycanda Moskva mədəniyyəti günləri” çərçivəsində İTAR-TASS-ın fotoqraflarının “Moskva gəzintisi” adlı sərgisi açılıb.
Tədbirdə çıxış edən mədəniyyət və turizm naziri Əbülfəs Qarayev sərgidə 10 fotoqrafın Moskvanı əks etdirən 70 foto əsərinin nümayiş olunduğunu deyib. O bildirib ki, bu cür tədbirlərin keçirilməsi iki ölkə arasında əlaqələrin genişləndirilməsi üçün çox vacib addımdır: “Qeyd etmək lazımdır ki, bu əlaqələr heç zaman kəsilməyib. Rusiyanın yaradıcı kollektivləri, şəxsiyyətləri daim Azərbaycana gələrək burada müxtəlif səpgili tədbirlər keçirirlər”. Məlumat üçün bildirək ki, tədbirin rəsmi açılışı dünən Azərbaycan Dövlət Akademik Opera və Balet Teatrında olub. Bu gün Azərbaycan Dövlət Musiqili Komediya Teatrında “Modern” Moskva Dram Teatrının quruluşunda Rüstəm İbrahimbəyovun “Mənim əziz kişilərim” əsəri əsasında hazırlanmış eyni adlı tamaşa nümayiş etdiriləcək. Bununla da Bakıda Moskva Mədəniyyət Günlərinə yekun vurulacaq. Qeyd edək ki, dünən Azərbaycan prezidenti İlham Əliyev “Azərbaycanda Moskva mədəniyyəti günləri”ndə iştirak etməyə gəlmiş Moskva merinin birinci müavini, Azərbaycanla Moskva hökuməti arasında hökumətlərarası iqtisadi komissiyanın həmsədri Lyudmila Şvetsovanın rəhbərlik etdiyi nümayəndə heyətini qəbul edib.

Zaman.- 2007.- 4-5 oktyabr.- S.2.