Nəsibə Abdullayeva Bakıya gəlib

Özbəkistanın Xalq artisti, əslən azərbaycanlı Nəsibə Abdullayeva ötən gün Bakıya səfər edib. Müğənninin uzun fasilədən sonra yenidən Azərbaycan bəstəsini oxuyaraq ona klip çəkdirdiyi barədə məlumat vermişdik. Mahnının müəllifi Baba Vəziroğlu müğənninin hansı məqsədlə Azərbaycana gəldiyi barədə bunları söylədi: "Nəsibə xanım bura bizimlə görüşmək və Bakı üçün darıxdığından gəlib. Gələcəkdə isə böyük layihələr olacaq".
Qeyd edək ki, Nəsibə xanım Baba Vəziroğlunun sözlərinə Kamal müəllimin bəstəsi olan "Səndən nigaranam" mahnısını ifa edib. Mahnının efir variantı artıq bir müddətdir telekanallarda yayımlanır. Baba Vəziroğlunun məlumatına görə, yaxın aylarda N.Abdullayevanın burada böyük konsertinin təşkili də nəzərdə tutulub. Müğənninin Bakı səfəri çərçivəsində bu barədə mahnının müəllifləri ilə söhbətinin olacağı istisna edilmir.
Oxumaqla kifayətlənməyən N.Abdullayevanın filmə çəkildiyini öyrəndik. Xatırladaq ki, "Sui-qəsd" adlanan film psixoloji məqamlarla zəngindir və burada o, baş rollardan birini oynayıb.

Mövqe.- 2007.- 18-19 sentyabr.- S. 13.