Əliyev A.

Ömrün uğur başlanğıcı

İlqar Talıbov 1991-ci ildə anadan olub. 2007-ci ildə Bakı şəhəri 160 saylı orta məktəbi bitirdikdən sonra "British Council" ingilisdilli tədris mərkəzinə qəbul edilib. Hazırda Moskva Dövlət Universitetinin beynəlxalq iqtisadi əlaqələr fakültəsinin tələbəsidir. 5 yaşından idman rəqsləri ilə məşğul olan İlqar həmçinin təsviri sənətlə də öz fəaliyyətini davam etdirir. \2001-2006-cı illərdə onun nəqqaşlıq və fotoşəkillərdən ibarət fərdi sərgisi Azərbaycan Respublikası Gənclər və İdman, Mədəniyyət və Turizm nazirliklərinin və Azərbaycan Mədəniyyəti Dostları Fondunun dəstəyi ilə keçirilib. İdman rəqsləri üzrə Avropa, Rusiya, 3 dəfə isə Qafqaz kubokları yarışlarının qalibidir.

İlqarın idmançı və rəssam kimi 92 sertifikatı, fərqlənmə diplomları və medalları var. Həyatda qazandığı uğurlar barədə İlqar belə deyir:

- Hər kəsə Allah bir ömür verir. Yaşam tərzindən asılı olmayaraq, hamının içində bir dünya yatır. Əsl istedad odur ki, bəşər övladı üçün qaranlıq qalan o dünyanı üzə çıxara bilsin. Mən çəkdiyim rəsmləri heç vaxt öncədən ölçüb-biçmirəm. Düşünmədiyim halda hansısa bir mövzu özü məni ardınca aparır.

İlqarın adı Gənclər və İdman Nazirliyinin xüsusi istedadlar haqqında nəşr etdirdiyi "Azərbaycan gəncliyi Azərbaycanın gələcəyidir" kitabına düşmüşdür. 2006-cı ildə Sankt-Peterburq televiziyasının 5-ci kanalının MDB ölkələrinin 15 illiyinə həsr etdiyi verilişdə respublikamızla bağlı hazırladığı süjet məhz İlqar Talıbova həsr edilmişdir.

İlqar deyir:

- Həyatımda ən xoşbəxt anım ümummilli lider Heydər Əliyevlə görüşdüyüm gündür. Mən dahi insanla görüşəndə 5 yaşım vardı. Ulu öndər Heydər Əliyevi həyatda görəcəyimə inanmırdım. Mirvarid Dilbazinin 85 illik yubileyinə dəvət aldığıma çox sevinirdim. Həmin gecədə ümummilli lider Heydər Əliyevin də iştirak edəcəyini bizə demişdilər. Belə bir şəxsiyyətin qarşısında çıxış etmək böyük məsuliyyət tələb edirdi. Məşqlər zamanı bizə harada duracağımızı başa salırdılar. Nəhayət, həmin gün gəlib çatdı. Mən Tofiq Quliyevin musiqisinin sədaları altında vals oynaya-oynaya mikrofona yaxınlaşıb şeir oxudum.
Şeir sona çatanda salonu alqış sədaları bürüdü. Bu vaxt Heydər Əliyev səhnəyə qalxdı. Mikrofona yaxınlaşan ulu öndər öncə İlqarı qucaqlayıb bağrına basdı. Balaca İlqar isə əli ilə Heydər Əliyevin əlinə toxunaraq dayandı.

- Mən inana bilmirdim ki, belə bir insanla yanaşı dayanmışam. Demə, bu hərəkətim operatorların, digər iştirakçıların nəzərindən yayınmamışdı. Tədbirdən sonra mənə yaxınlaşıb soruşdular ki, sən nə edirdin? Mən dedim ki, istəyirdim Prezidentin yanında olum.

Azərbaycan Dövlət Televiziyası İlqar haqqında "Qaranquşam, məni tanı" sənədli filmi çəkib. Həmin film YUNİSEF-in mükafatına layiq görülüb. İlqarın ulu öndərlə həmin görüşü də filmdə əksini tapıb.

- Hər kəsin həyatı maraqlı və mənalı anlarla dolu olur. İllər keçməsinə baxmayaraq, o anları hələ də xatırlayıram. Heydər Əliyev mənim üçün həmişə canlıdır.

İlqarın nailiyyətləri çoxdur. Bu günlərdə Bakıda 43 dövlətin qatıldığı "Dini fərqlilikdən kənar islamofobiya və ksenofobiyanın müxtəlif növləri: gənclərə təsiri və qarşısının alınmasında gənclərin fəaliyyəti" mövzusunda beynəlxalq konfrans keçirilmişdir. Azərbaycan çempionu, gənc rəssam İlqar Talıbovun 7 yaşında "Allahın varlığı və birliyi" mövzusunda çəkdiyi rəsm əsəri konfransın kataloquna daxil edilmişdir. Rəsmin işıq üzü görməsindən on ilə yaxın bir vaxt keçsə də, bu gün də öz aktuallığını qoruyub saxlamaqdadır. Əbəs yerə deyil ki, həmyerlimizin bu uğuru 43 dövlətdən ölkəmizə gələn qonaqların diqqətini cəlb etmişdir.

10 il əvvəl İlqar Talıbovun yaradıcılıq süzgəcindən keçən bu əsər haqqında konfransda iştirak edən xarici ölkələrin nümayəndələri xoş sözlər söyləmişlər. İlqar Talıbovla görüşümüzdə o, 7 yaşında bu mövzuda çəkdiyi əsərin 10 ildən sonra 43 dövlətin qatıldığı forumun kataloquna salınmasını bugünədək həyatda qazandığı uğurlardan sayır. Dünyada sülhün qorunması üçün insanların birliyini, vahidliyini xatırladan müəllif onu da bildirdi ki, tolerantlığın canlı nümunəsi olan respublikamızda bu sahədə xeyli iş görülmüşdür.

İ.Talıbov qeyd etdi ki, bundan əvvəlki müsabiqənin mövzusu "Yol hərəkəti qaydaları" idi. Xıdırzində ziyarətgahına gedən dağ yolunu çəkən müəllifin əsəri indi Almaniyadadır. bp şirkəti təqvimlərdə bu əsəri çap edib (1999). Bir çox müsabiqədə uğurla iştirak edən İlqar əsərlərində Yer kürəsini, işğal altında olan torpaqlarımızı göstərərək bütün dünyaya ingilis dilində bu sözlərlə müraciət etmişdir: "Dünyanı heç kim bölə bilməz, Tanrıdan başqa!" Onun yaratdığı rəsm əsərləri İngiltərədə çap olunub. Amerikadan, İngiltərədən xeyli minnətdarlıq məktubları da alıb.

İlqar irəliyə doğru yorulmadan çalışır. Çünki qarşıda bir çox müsabiqə var. Həmin müsabiqələrdə iştirakına gəlincə, gənc rəssam bildirdi ki, çəkdiyi hər əsərdə Allaha inam, vətən sevgisi olduğu üçün həmişə qalib gələcəyinə əmindir. Ona da əmindir ki, gün gələcək, torpaqlarımızın işğaldan azad olunmasına əsər həsr edəcəkdir. O günə isə az qalıb.

Azərbaycan.- 2008.- 13 dekabr.- S. 5.