Milli seçim turundan
sonrakı düşüncələr
...əsas amil
səs deyil, şou yaratmaq bacarığıdır
Ötən əsrin ortalarından
bəri keçirilən
"Eurovision" müasir
mahnı müsabiqəsinin
səviyyəsinin və
xassəsinin enmə şkalası üzrə dəyişməsi barədə
fikir söyləyənlərin
sayı artdıqca, Azərbaycanın bu yarışmanın iştirakçılarından
biri kimi tanınmaq həvəsi də artmaqda idi.
Əksəriyyət İctimai Televiziyanın Avropa Yayım Şurasına üzv olmasını səbirsizliklə
gözləyirdi. Çünki
yalnız bu halda ölkəmiz "Eurovision"un təşkilat komitəsinə
müraciət edərək
müsabiqədə iştirak
etmək arzusunu bildirə bilərdi.
Peşəkar musiqiçilərin
bir qismi "Eurovision"a bu qədər can atmağın yersiz olduğunu, ölkəmizin daha yüksək səviyyəli
müsabiqələrin iştirakçısı
olmaq uğrunda çalışmağını tövsiyə edirdilər və etməkdədirlər.
Onların sırasında
yekun seçim turunun münsiflər heyətinə daxil olanlar da var
idi, olmayanlar da.
Uzun sözün
qısası, fevralın
2-də - Azərbaycan
Gəncləri günündə
- Heydər Əliyev adına İdman-Konsert Kompleksində kifayət qədər yaxşı təşkil və tərtib edilmiş "Odlar yurdu" adlı milli seçim turunda
"Eurovision-2008"ə Azərbaycandan
olan 3 namizədin şou-proqramı baş tutdu. "Unformal" rok
qrupu, Elnur Hüseynov və Aynur İsgəndərli (sonuncunun finalçılardan
biri kimi etiraf olunmasının necə baş verdiyini anlamaq çox çətindir) mötəbər münsiflər
heyəti qarşısında
seçim mərhələsi
zamanı təqdim etdikləri kompozisiya ilə yanaşı, məxsusi olaraq müsabiqə üçün
yazılmış
mahnını da ilk dəfə ifa etdilər. Bu qala-konsertə hazırlıq zamanı yeni duet də
yarandı - Gövhər
Həsənzadənin Zəhra
Bədəlbəylinin sözlərinə
bəstələdiyi "Day
after day" mahnısının aranjemanı
zamanı qərara alınıb ki, Elnur bu kompozisiyanı
Samir Cavadzadə ilə birlikdə təqdim etsə, yaxşı olar. Bəlli olduğu kimi, münsiflər heyəti xeyir və şər, ağ və qara qüvvələrin mübarizəsi kimi bəşəri mövzu üzərində qurulmuş
məhz bu nömrəni "Eurovision
- 2008"ə ən layiqli hesab etdi.
Ola bilsin qapalı şəkildə
keçən müzakirə
zamanı münsiflərin
rəyləri Elnur Hüseynov - Samir Cavadzadə dueti ilə "Unformal" rok qrupunun arasında
vurnuxub. Çünki
"Unformal"ın
çıxışı, xüsusən də müsabiqə üçün
nəzərdə tutulmuş
kompozisiya daha ifadəli idi. Bu da təbiidir
- rok janrına həvəsli olan bu gənclər ifa etdikləri mahnıları özləri
yazırlar. Onların
çıxışında yeganə qüsur kompozisiyanın ümumi ahəngi ilə çox həmahəng olan balaban çalğısı
ilə bağlıdır.
Daha doğrusu, çalğıçının səhnədəki yeri ilə. Məsələ burasındadır ki, eyni görüntünü
ötənilki "Eurovision"da müşahidə etmişdik. Amma çıxışın, aranjemanın
ümumi dəqiqliyinin
qarşısında bu
qüsuru çox asanlıqla düzəltmək
olardı. Əlbəttə,
əgər "Eurovision
- 2008"ə "Unformal"
gedəsi olsaydı...
Gözlənildiyi kimi, "Day
after day" mahnısında Elnurun Xeyiri, Samirin isə Şəri canlandırmaları, sonda ikincinin kiçik bir muğam parçası ifa edərək Qara qüvvədən birdən-birə Ağ qüvvəyə çevrilməsi,
ya da xeyirxahlığın
doğruluğunu qəbul
etməsi heç də birmənalı reaksiya doğurmadı. Bəstəkar
Vüqar Camalzadə Şərin muğam oxumasının yolverilməz
olduğunu, muğamın
aliliyi sayəsində
Ağ qüvvələrlə
Qara qüvvələrin
ümumi dil tapa bilməsi ideyasının sonadək
həll olunmadığını
bildirib. Gövhər Həsənzadə isə
irada cavab olaraq "Eurovision -
2008"in vaxtına, yəni may ayına
qədər hələ
kifayət qədər
vaxt qaldığını,
aranjemanı, sözləri
bir az da
cilalamağın mümkün
olduğunu deyib.
Bəli, may
ayına qədər Elnur Hüseynovla işləyən peşəkarların
işi çox olmalıdır ki, onun səsinin eşidimliyini təmin edəcək məsləhətlərini
versinlər. Qəribədir
ki, vokal imkanları ola-ola Elnur hesab edir
ki, "Eurovision" kimi müsabiqələrdə
əsas amil səs deyil, şou yaratmaq bacarığıdır. Halbuki
elə həmin "Eurovision"un səhnəsi vaxtilə, məsələn, Selin Diona da uğur
gətirmişdi. Bu sənətkarın
hər hansı köməkçi atributlarsız,
yalnız və yalnız daim üzərində işlədiyi
güclü səsi sayəsində və ən əsası sırf özü kimi, Selin Dion
olaraq, ifa tərzi ilə hansısa assosiasiyalar, bənzətmələr doğurmadan
bu gün də dünya estrada səhnəsində parlaması
isə müzakirə
mövzusu deyil.
Həftə içi.- 2008.- 6 fevral.- S. 8.