Yaradıcı ziyalıların bir qrupuna orden və fəxri adların vəsiqələri təqdim edilmişdir

İyulun 29-da Mədəniyyət və Turizm Nazirliyində Azərbaycan Prezidenti İlham Əliyevin Sərəncamı ilə təltif olunmuş ədəbiyyat və incəsənət xadimlərinin bir qrupuna orden və fəxri adların vəsiqələri təqdim edilmişdir.
Mədəniyyət və turizm naziri Əbülfəs Qarayev ümummilli lider Heydər Əliyevin mədəniyyətimizin inkişafına diqqət və qayğısından danışmışdır. Nazir qeyd etmişdir ki, ulu öndərimiz xalqın təkidli tələbi ilə hakimiyyətə qayıtdıqdan sonra ölkəmizdə mədəniyyət sahəsi də yeni inkişaf mərhələsinə qədəm qoymuşdur. Azərbaycanı dərin böhrandan çıxaran ümummilli lider elm, ədəbiyyat, mədəniyyət və incəsənət ocaqlarını müxtəlif siyasi qüvvələrin təsirindən xilas edərək bu təşkilatlara öz missiyasını yerinə yetirmək üçün hərtərəfli şərait yaratmış, onların uzun illər ərzində formalaşmış maddi-texniki bazasının dağıdılmasının qarşısını almışdır. Bu dahi şəxsiyyət həmişə şair və yazıçıların, mədəniyyət və kino xadimlərinin, ümumiyyətlə, yaradıcı insanların əməyinə layiqli qiymət vermiş, onların sosial və digər problemlərinin həlli istiqamətində möhkəm hüquqi baza yaratmışdır. Ulu öndər Heydər Əliyevin yaradıcı insanlara dövlət qayğısını Prezident İlham Əliyev uğurla davam etdirir.
Ə.Qarayev bildirmişdir ki, Prezident İlham Əliyevin sərəncamlarına əsasən yazıçı-publisist Əli İldırımoğlu "Şöhrət ordeni" ilə təltif olunmuş, Azərbaycan Dövlət Simfonik Orkestrinin violonçel ifaçısı Eldar İsgəndərov xalq artisti, kinoaktrisa Zemfira Sadıxova və nağara ustası Natiq Şirinov əməkdar artist fəxri adlarına layiq görülmüşlər.
Nazir fəxri adların vəsiqələrini və "Şöhrət ordeni"ni sahiblərinə təqdim etmişdir.

Azərbaycan.- 2008.- 30 iyul.- S. 2.