Mədəniyyət və turizm sahəsində Azərbaycan-İordaniya əlaqələri inkişaf edir

Ölkəmizin İordaniya Haşimilər Krallığındakı səfirliyindən AzərTAc-a bildirmişlər ki, iyulun 3-dən 6-dək Azərbaycanın mədəniyyət və turizm naziri Ə.Qarayevin rəhbərlik etdiyi nümayəndə heyəti İordaniyada rəsmi səfərdə olmuşdur.
Səfər çərçivəsində Ə.Qarayev İordaniya Kralının Divanının rəhbəri B.Avadallah, mədəniyyət naziri xanım N.Bəkir, turizm naziri xanım M.Xatib ilə görüşlər keçirmiş, Krallığın mədəniyyət və turizm sahəsindəki imkanları ilə tanış olmuşdur.
İyulun 3-də İordaniya Kralının Divanının rəhbəri B.Avadallah ilə keçirilən görüşdə Ə.Qarayev Azərbaycan Prezidenti İlham Əliyevin Kral II Abdullaha səmimi salamlarını çatdırmış və İordaniyanın dövlət başçısına ünvanladığı məktubunu təqdim etmişdir. Ə.Qarayev sürətlə inkişaf edən ikitərəfli münasibətlərə toxunaraq ölkə Prezidenti İlham Əliyevin 2007-ci il iyulun 29-30-da İordaniyaya rəsmi səfərindən sonra bu əlaqələrin daha yüksək səviyyəyə qalxdığını vurğulamış və Kral II Abdullahın bu ilin may ayında Azərbaycana etdiyi səfərinin ikitərəfli münasibətlərin inkişafında yeni mərhələ açdığını bəyan etmişdir. Ə.Qarayev Azərbaycanda həyata keçirilən islahatlar, xüsusən mədəniyyət və incəsənət sahəsində görülən işlər barədə B.Avadallaha ətraflı məlumat vermişdir.
Görüş zamanı ölkələrimiz arasında siyasi əlaqələrin yüksək səviyyədə olduğu qeyd olunmuş və bu əlaqələrin mədəniyyət və turizm sahəsində öz əksini tapması üçün hər iki tərəfin birgə səy göstərməsinin vacibliyi vurğulanmışdır. Azərbaycan nümayəndə heyətinin rəhbəri Ermənistan-Azərbaycan, Dağlıq Qarabağ münaqişəsinə toxunaraq İordaniya tərəfindən Azərbaycana göstərilən daimi dəstəyə görə minnətdarlığını bildirmişdir. B.Avadallah Ermənistan-Azərbaycan, Dağlıq Qarabağ münaqişəsinin sülh yolu ilə həllinin tərəfdarı olduğunu qeyd edərək ölkəsinin bundan sonra da Azərbaycanın mövqeyini dəstəkləyəcəyini bəyan etmişdir.
Ə.Qarayevin rəhbərlik etdiyi nümayəndə heyəti İordaniyanın mədəniyyət naziri N.Bəkir və turizm naziri M.Xatib ilə görüşmüşdür. Səmimi şəraitdə keçən görüşlər zamanı qarşılıqlı səfərlərin, mədəniyyət və turizm sahəsində təcrübə mübadiləsinin və əməkdaşlığın digər vacib elementlərini özündə cəmləşdirən tədbirlərin qarşılıqlı əsasda həyata keçirilməsinin vacibliyi qeyd olunmuşdur.
Söhbət zamanı ikitərəfli əlaqələrdən danışan Ə.Qarayev Azərbaycanla İordaniya arasında bütün sahələrdə, o cümlədən mədəniyyət və turizm sahəsində əməkdaşlığın konkret layihələr üzrə inkişaf etdirilməsinin zəruriliyini qeyd etmiş, Azərbaycan incəsənət kollektivlərinin İordaniyada təşkil olunan festivallarda iştirakı, qarşılıqlı şəkildə hər iki ölkədə mədəniyyət günlərinin keçirilməsi istiqamətində birgə səy göstərilməsinin gərəkli olduğunu vurğulamışdır.
N.Bəkir və M.Xatib Azərbaycan nümayəndə heyətinin səfərinin uğurlu keçməsini arzu edərək, belə səfərlərin ikitərəfli münasibətlərə öz töhfəsini verəcəyini vurğulamışlar. Keçirilən görüşlər zamanı Ə.Qarayev İordaniyanın mədəniyyət naziri N.Bəkiri və turizm naziri M.Xatibi Azərbaycana səfərə dəvət etmiş, dəvət məmnuniyyətlə qəbul edilmişdir.
Səfər çərçivəsində nazir Ə.Qarayev İordaniyanın özəl rəsm qalereyasını ziyarət etmiş və Turizm Kollecində olmuşdur. Kollecin təlim mərkəzinin rəhbərləri ilə görüş zamanı Ə.Qarayevə həmin müəssisənin fəaliyyəti, əldə edilmiş nailiyyətlər və gələcək planlar haqqında ətraflı məlumat verilmişdir. Azərbaycan nümayəndə heyəti İordaniyanın bir sıra tarixi-mədəni abidələrini ziyarət etmiş və Ölü dəniz sahilində yerləşən bəzi turizm-istirahət zonalarının imkanları ilə tanış olmuşdur.
Ə.Qarayevin şərəfinə İordaniyanın turizm naziri adından rəsmi nahar və ölkəmizin mədəniyyət naziri adından rəsmi iftar ziyafəti verilmişdir.
Səfər İordaniya kütləvi informasiya vasitələrində geniş işıqlandırılmışdır.
Ə.Qarayevin rəhbərlik etdiyi nümayəndə heyətinin İordaniyaya səfərinin və orada keçirdiyi görüşlərin uğurla başa çatması Azərbaycan-İordaniya nümasibətlərinin inkişafı üçün lazımi dəstək olmuşdur.

Azərbaycan.- 2008.- 8 iyul.- S. 13.