Xatirə

"Ave Mariya" təqdim olundu

Dünən Muğam Teatrında Arif Qazıyevin rəhbərliyi ilə klassik janrda mahnılar ifa edən Lətifə Bəndəliyevanın yeni klipinin təqdimatı keçirildi. "Ave Mariya" adlı bu klipin rejissoru Fuad Əlişov, prodüseri Sevinc Əlişova, aranjemançısı Yaşar Baxışdır. Çox maraqlı süjet xətti olan klipin araya-ərsəyə gəlməsi barədə klipmeykerlə söhbət etdik: "Çoxdan idi həmişə aktual olan dinlərarası münaqişə mövzusu məni düşündürürdü. Ümumiyyətlə, bu məsələ həmişə mənim üçün maraqlı olub. Nəhayət, Lətifə xanım bu mahnını mənə təqdim edəndə bildim ki, bu mənim axtardığım bir musiqidir və mövzu barədə düşüncələrimi bu klip vasitəsilə tamaşaçılara çatdıra bilərəm". Klipdə 2 ayrı dinə mənsub olan gəncin bir-birini sevməsi, lakin valideynlərin onların bu sevgisinə qarşı çıxması göstərilir. Səbəb isə oğlanın müsəlman, qızın xristian olmasıdır: "Mariya" xristianlarda anaya aid olan bir duadır. Klipin sonunda qız bu duanı oxuyaraq deyir: "Həzrəti-Məryəm, biz günahkar bəndələrinə dua et". F.Əlişov bu ekran işinin 1 günə çəkildiyini, eyni zamanda izləyicilərdə maraq oyadacağına əmin olduğunu bildirdi. Lətifə xanımı ilk təqdimat günündə media nümayəndələri ilə yanaşı, bir sıra sənət və elm adamları da təbrikə gəlmişdilər. Onlar klipə baxandan sonra öz ürək sözlərini söyləyərək klipdən və mahnıdan razı qaldıqlarını bildirdilər. Onu da qeyd etdilər ki, mənasız, zövqsüz musiqilərin baş alıb getdiyi bu dövrdə belə düşündürücü əsərlərə çox ehtiyac var.

Həftə içi.- 2008.- 18 iyul.- S. 8.