Ağaoğlu T.

Muğamlarımız dünyanı heyrətləndirir

Milli musiqi sərvətimizin nümunələrindən olan muğam sənətinin yaranışı qədimdir. İlk ifaçıları isə daim ehtiramla xatırlanır, yad edilirlər. Cabbar Qaryağdıoğlu, Xan Şuşinski, Seyid Şuşinski, Ağabala Abdullayev, Yaqub Məmmədov, Əbülfət Əliyev və başqalarından qalmış səs yadigarları bu gün də həvəslə, maraqla dinlənilir.
Muğama qayğı son illər daha da artmışdır. Mahir muğam ifaçıları bu sənəti dünyada tanıtdırırlar. Onlardan biri də xalq artisti, məlahətli səsiylə şöhrət qazanmış Alim Qasımovdur. Görkəmli xanəndə yaxın günlərdə növbəti qastrol səfərindən - Yaponiyadan qayıdıb. O dedi:
- Dünyanın çox ölkəsində qastrol səfərində olmuşam. Xalq mahnıları, təsniflər, muğamlar oxumuşam. Dilimizi bilməyənlər də ifalarımdan zövq alıblar. Yaponiyaya gedəndə isə müəyyən qədər tərəddüd keçirirdim. Amma ifa zamanı yaponiyalı dinləyicilərin kövrəlməsini görəndə daha da ürəkləndim.
Səhnədə özümü doğma mühitdə olduğu kimi hiss edirdim. İfalarım alqışlarla qarşılanırdı. Sanki möcüzəli bir aləmə düşmüşdüm. Tamaşaçılar, dinləyicilər səhnəyə çıxır, bizlərə gül dəstələri verir, tar-kamana diqqətlə, heyranlıqla baxırdılar. Səmimi alqışları, qarşılanmanı görəndən sonra növbəti dəfə də bu ölkəyə səfər edəcəyimə vəd verdim.
Milli musiqimizi tanıtdırmaq, sevdirmək üçün hər bir ifaçı var gücü ilə çalışmalıdır. Bu baxımdan xalq artisti Alim Qasımovun yaradıcılığı təqdirəlayiqdir.

Azərbaycan.- 2008.- 27 iyul.- S. 4.