Klassik musiqini sevənlər
yenidən bir araya gəliblər
Musiqi
Mədəniyyəti Dövlət Muzeyinin nəzdində
fəaliyyət göstərən "Klassik musiqini
sevənlər" klubunun Avropa klassik musiqisinə həsr
edilmiş toplantısı keçirilib. Maestro
Niyazinin ev muzeyində düzənlənən
toplantıda klub üzvləri "Azərbaycanda
klassik musiqinin yayılma mənbələri"
mövzusunda çıxış
ediblər.
Musiqi Mədəniyyəti Muzeyinin direktoru Alla Bayramova bu cür yığıncaqların
klubun təsis edildiyi vaxtdan hər həftə çərşənbə günləri
təşkil olunduğunu,
klub iştirakçılarının
təşəbbüsü ilə gerçəkləşən
toplantılarda seçilən
müxtəlif mövzulara
dair maraqlı müzakirlər aparıldığını bildirib.
O, klubun ilk toplantısının dahi
bəstəkar Qara Qarayevin 90 illik yubileyilə əlaqədar
olduğunu diqqətə
çatdırıb. A.Bayramova
klassik musiqinin özəlliklərindən danışaraq
Azərbaycanda Avropa musiqi ənənələrinin
XIX əsrin sonu, XX əsrin əvvəllərindən
təşəkkül tapdığını
qeyd edib: "O dövrdə musiqi alətlərinin əksəriyyəti
Almaniyadan gətirilir,
Avropa ölkələrindən
bir sıra musiqiçilər Azərbaycana
gəlirdi. Avropa klassik musiqisinin
təsiri nəticəsində
Azərbaycanda klassik musiqi əsasən iki istiqamətdə formalaşmışdı. Sırf
Avropa musiqisi ilə yanaşı milli musiqimizlə, muğamla sintez təşkil edən kompozisiyalar yaranmağa başlamışdı. Bu
proseslər Azərbaycanda
klassik musiqiçilər
nəslinin yetişməsinə
təkan verdi".
Musiqişünas Raya Abbasova hazırda
Azərbaycanın zəngin
klassik musiqi ənənələrini davam
etdirən istedadlı
gənclərin olduğunu
önə çəkib.
Bəstəkarlarımızın musiqinin inkişafındakı
xidmətlərindən danışaraq
Azərbaycanın və
Avropanın dünya şöhrətli musiqiçiləri
barədə təəssüratlarını
iştirakçılarla bölüşdü.
Sonda konsert
proqramı ilə çıxış edən
"Badu-Kubə" simli kvarteti Cavad Tağızadənin rəhbərliyi ilə Hendel, Mosart, Şopen, Brams, Molkolm və başqa bəstəkarların
əsərlərini səsləndirib.
525-ci qəzet.- 2008.- 4 iyul.- S. 7.