Ruzigar F.

 

Gəncədə "Arşın mal alan"ın təqdimatı

 

80 yaşlı Gəncə Musiqi Texnikumunun müəllim tələbə kollektivi bu günlərdə dahi sənətkarımız Üzeyir bəy Hacıbəyovun "Arşın mal alan" operettasını tamaşaçılara təqdim etmişdir. Operettaya Gəncə Dövlət Kukla Teatrının baş rejissoru Fərmail Paşayev quruluş vermişdir. Orkestrin rəhbəri, musiqi texnikumunun müəllimi Elçin Elçiyevdir. Rəqslərin quruluşçusu Eldar Musayevdir.
Bəlkə Gəncə Dövlət Dram Teatrının uzun illərdən bəri tamaşaçı üçün qəribsəyən səhnəsi bu qədər "sevinməmişdi". Tamaşadan sonra bir neçə adamla söhbət etdik. Böyük əksəriyyət təəssüf hissi ilə ötən əsrin səksəninci illərini xatırladı. O zaman ki, şəhərdə neçə-neçə mədəniyyət sarayı, klub, musiqi evi, xalq teatrı, saysız-hesabsız bədii özfəaliyyət kollektivləri s. fəaliyyət göstərirdi. İşdən sonra, istirahət günləri adam bilmirdi hansını seçsin, hansı kollektivin qonağı olsun. Şəhərdə istedadlar da çox idi, diqqət qayğı da! Tədricən dövran dəyişdi, mədəniyyət ocaqları hissə-hissə kommersiya məkanlarına, kitab mağazaları yeməkxanalara, şadlıq evlərinə çevrildi. Bədii özfəaliyyətimizdəki fitri istedadların əvəzində şou-biznesin bayağı "ifaçıları" - "mikrofon müğənniləri" meydan sulamağa başladılar. Əsl sənət bir kənarda qaldı. Zövqlər korlandı. İş o yerə gəlib çatdı ki, düşmənlərimiz xalq mahnılarımıza, klassik bəstəkar əsərlərinə sahib çıxmağa başladılar. Toylarımız, el şənliklərimiz bayağılaşdı, diskotekaya çevrildi.
Deyəsən, "tilsim" qırılır. Gəncə səhnəsində ölməz sənətkarımız Üzeyir bəyin qəlblərə hakim kəsilən musiqisi səsləndi. Pərdə yavaş-yavaş açıldı. Səhnə işıqlandı. Musiqi texnikumunun müəllim tələbələrinin ifasında "Arşın mal alan" operettası bir andaca tamaşaçıları tilsimlədi. Canlı musiqi, yüksək ifaçılıq hamının qəlbində qürur iftixar hissi oyatdı.
Operettanı, adətən, simfonik orkestr müşayiət edir. Lakin maestro Elçin Elçiyevin təşəbbüsü sayəsində ilk dəfə olaraq simfonik orkestri xalq çalğı alətləri əvəz edirdi. Orkestrin ifasında Üzeyir bəyin musiqisi böyük ustalıqla səslənir, səhnə aktyorların ifası ilə bütövlük yaradırdı.
Birinci səhnədə Əsgər (Rəhim Quliyev) ilə xalasının (Sevinc İbrahimova) dueti tamaşaçılara xüsusi zövq verdi. Sevinc xanım İbrahimova görkəmli sənətkarımız Fidan Qasımovanın tələbəsi olub. Hələ səksəninci illərdə onun ifa etdiyi romansların xoş təəssüratı musiqisevərlərin qəlbinə hakim kəsilmişdi.
Rəhim Quliyev (Əsgər) öz ifa tərzi ilə yadda qalır. Vaqif Mirzəyev istər təcrübəli-müəllim, istərsə istedadlı xanəndə kimi hörmət qazanmış sənət adamıdır. Onun ifasında Sultan bəy obrazı canlı inandırıcıdır.
Gülçöhrə (Leyla Məmmədova), Vəli (Rüstəm Cəfərov), Telli (Samirə Məmmədova), Süleyman (Məhərrəm Qasımov) obrazları da uğurlu alınmışdır. Onların özlərinə məxsus ifaçılıq qabiliyyəti tamaşaçını razı salır. Dahi Üzeyir bəyin ölməz musiqisinin mikrofonsuz, necə deyərlər, müasir texniki avadanlıqların süzgəcindən keçmədən tamaşaçıya təqdim edilməsi təqdir olunandır.
F.Paşayev istedadlı rejissordur. Onun musiqili komediyaya quruluş verməsi yeni olsa da, uğurludur. Eldar Musayevin quruluş verdiyi rəqslər rəqqasə qızların müvəffəqiyyətli çıxışları da tamaşaya uğur gətirdi.
Bir yenilik başlanır. Tamaşadan alınan ilk təəssürat budur ki, deyəsən, ətalət buzu qırılır. İlk uğurdan sonra düşünürsən: Gəncənin "musiqi akademiyası" sayılan musiqi texnikumunun bazasında mini-opera teatrı yaratmaq olarmı?!. Baza var ilk təcrübə - "Arşın mal alan" operettasının tamaşası bunu təsdiq etdi. Duyan, düşünən tamaşaçı da kifayət qədərdir. Kollektivin uğurlu çıxışından sonra tamaşaçılar zaldan, səhnədən, onlara saatyarımlıq böyük mənəvi zövq verən "aktyorlardan" ayrılmaq istəmirdilər.

 

Azərbaycan.- 2008.- 25 iyul.- S. 8.