İnformasiya cəmiyyəti ideologiyasının mahiyyəti müzakirə olunmuşdur

Azərbaycan Milli Elmlər Akademiyasının İnformasiya Texnologiyaları İnstitutunda (AMEA İTİ) Fövqəladə Hallar Nazirliyinin bir qrup əməkdaşı ilə görüş keçirilmişdir.

AMEA-dan bildirmişlər ki, görüşdə İnformasiya Texnologiyaları İnstitutunun direktoru, AMEA-nın müxbir üzvü Rasim Əliquliyev Fövqəladə Hallar Nazirliyinin öz fəaliyyətini müasir texnologiyalar əsasında qurmasını müsbət dəyərləndirmişdir.

Elektron hökumətin qurulması prosesində vahid informasiya təhlükəsizliyi sisteminin yaradılması zərurətinin meydana çıxdığını qeyd edən alim müvafiq qurumlar, o cümlədən də rəhbərlik etdiyi ınstitut tərəfindən bu istiqamətdə məqsədyönlü tədbirlər həyata keçirildiyini bildirmişdir.

Ümummilli liderimiz Heydər Əliyev tərəfindən imzalanmış "Azərbaycan Respublikasının inkişafı naminə informasiya və kommunikasiya texnologiyaları üzrə Milli Strategiya (2003-2012-ci illər) ölkə Prezidenti İlham Əliyev tərəfindən təsdiq edilmiş "Azərbaycan Respublikasında rabitə və informasiya texnologiyalarının inkişafı üzrə 2005-2008-ci illər üçün Dövlət Proqramı ("E-Azərbaycan")" barədə söz açılmış, bu sənədlərin əhəmiyyəti vurğulanmışdır.

Eyni zamanda, informasiya cəmiyyəti ideologiyasının mahiyyəti, informasiya təhlükəsizliyinin təminatı prinsipləri, o cümlədən "E-Azərbaycan" Dövlət Proqramının həyata keçirilməsi istiqamətində atılan addımlar və s. məsələlər ətraflı müzakirə olunmuşdur.

Sonra İnformasiya Texnologiyaları İnstitutunda "İnformasiya təhlükəsizliyinin əsasları" tədris kursunu müvəffəqiyyətlə başa vurmuş FHN-in əməkdaşlarına sertifikatlar təqdim edilmişdir.

Respublika.- 2008.- 20 iyul.- S. 1.