Paşasoy

Yardımlıda Rəsulzadə parkı açıldı

Rayonun Şiləvəngə kəndində böyük öndərin büstü ucaldılacaq

Azərbaycan Xalq Cümhuriyyətinin 90 illik yubileyi Yardımlı rayonunda orijinal şəkildə qeyd olunub. Rayonun Şiləvəngə kənd sakini ixtisasca rus dili müəllimi olan Ağasəf Ağayev öz həyətyanı sahəsində Məmməd Əmin Rəsulzadənin adına park salıb. Cümhuriyyətin yubileyi münasibətilə həmin parkın açılış mərasimi də keçirilib. Tədbirdə rayon ziyalıları, müxalifət partiyalarının yerli təşkilatının təmsilçiləri və qonaqlar iştirak edib.
Qeyd edək ki, A.Ağayev həm də Ədalət Partiyası Yardımlı rayon təşkilatının sədridir. Elə bu səbəbdən də tədbirə Ədalət Partiyasının sədr müavini Mütəllim Rəhimli də qatılıb. O, çıxışı zamanı Rəsulzadənin şərəfli mübarizəsindən danışaraq bildirib ki, ucqar bir dağ kəndində Rəsulzadəyə olan bu ehtiram təqdirəlayiq nümunədir: “Məmməd Əminin heykəli onu sevənlərin qəlbində çoxdan ucalıb. Ağasəf müəllim bu gözəl təşəbbüsü reallığa çevirməklə ulu öndərə qısqanclıqla yanaşanlara ibrət dərsi verdi”.
A.Ağayev özü isə çoxdan ürəyində gəzdirdiyi bir ideyanı gerçəkləşdirə bilməsindən fəxr duyur. Onun sözlərinə görə, Məhəmməd Əminin adının bu cür əbədiləşdirilməsini özünə mənəvi borc sayır.
Müsavat Partiyası Yardımlı rayon təşkilatının sədri Şakir İsmayılovdan aldığımız məlumata görə, parkda Rəsulzadənin büstünün qoyulması da nəzərdə tutulub. Müsavat Partiyasının dəstəyi ilə hazırlanan büst yaxın günlərdə hazır olacaq. Parkda Rəsulzadəyə həsr olunmuş xatirə lövhəsi də asılacaq,  Cümhuriyyətin və böyük öndərin keçdiyi şərəfli yola aid materialların toplandığı kitabxana fəaliyyət göstərəcək.
Yeri gəlmişkən, tarixi dəlillərə görə, Bakıda 1920-ci il aprelin 28-də qurulan sovet hakimiyyəti Yardımlıda təqribən bir il sonra bərqərar olub. Cümhuriyyətin süquta yetirilməsi ilə barışmayan yerli qüvvələr pərakəndə şəkildə də olsa, imperiya cəlladlarına qarşı silahlı mübarizə aparıb. Elə tədbirdə də bu fikirlər səslənib və o vaxt şəhid olanlar anılıb.

Yeni Müsavat.- 2008.- 5 iyun.- S. 4.