Əliyev Ə.

Avropalı deputatlar Avropa Şurasını Azərbaycana qarşı ikili standartlara son qoymağa çağırmışlar

AŞ PA-nın yay sessiyası iyunun 24-də "Azərbaycanın Avropa Şurası qarşısında götürdüyü öhdəliklərin yerinə yetirilməsinin vəziyyəti" məsələsinin müzakirəsi ilə növbəti iş gününə başlamışdır.
Azərbaycan üzrə həmməruzəçilər Andres Herkel (Estoniya) və Yevgeniya Jivkova (Bolqarıstan) çıxışlarında ölkəmizdə seçki kampaniyası ilə əlaqədar Venesiya Komissiyasının irəli sürdüyü tövsiyələrin yerinə yetirilməsi istiqamətində vacib işlər görüldüyünü, beynəlxalq terrorizmə qarşı mübarizəni dəstəklədiyini bildir miş, mart və fevral aylarında Azərbaycana səfərləri zamanı dövlət rəsmiləri, siyasi partiyaların rəhbərləri, müxalifət təmsilçiləri və ictimaiyyətin nümayəndələri ilə keçirdikləri görüşləri xatırlatmış, Prezident İlham Əliyevin mart ayındakı əfv fərmanı ilə 59 məhbusun azad edilməsini müsbət hadisə kimi xüsusi vurğulamışlar.
Bunlarla yanaşı, söz azadlığı, kütləvi informasiya vasitələri ilə bağlı müəyyən iradlarını qeyd etmiş, qarşıdakı prezident seçkilərinin demokratik keçiriləcəyinə və demokratik təsisatların fəaliyyətinin daha da genişləndirilməsi üçün hərtərəfli imkan yaradılacağına inam bəslədiklərini bildirmişlər.
Böyük Britaniyadan, Türkiyədən, Rusiyadan, Fransadan, Estoniyadan, Norveçdən olan deputatlar məruzədəki "Azərbaycan" sözünü çıxarıb hər hansı bir ölkənin adı salınarsa, bunun məruzəyə heç cür təsir etməyəcəyi, məruzədə göstərilmiş bütün faktların digər ölkələrdə də mövcud olduğunu söyləmiş, ölkəmizdə baş verən mühüm müsbət dəyişikliklərin göz qabağında olduğunu, Azərbaycana qarşı təsirgöstərmə mexanizminə və Avropa Şurasını ona qarşı ikili standartlara son qoymağa çağırmışlar.
Avropalı deputatlar Azərbaycan ilə Avropa Şurası arasında əlaqələrin gündən-günə genişləndiyini, ölkəmizin götürdüyü öhdəlikləri layiqincə yerinə yetirdiyini, müxtəlif beynəlxalq qurumlarla sıx əməkdaşlıq etdiyini, Dağlıq Qarabağ probleminin beynəlxalq hüquq normalarına əsasən, Azərbaycanın ərazi bütövlüyü çərçivəsində həllini dəstəklədiklərini diqqətə çatdırmışlar.
Demokratiya sahəsində Azərbaycanda mühüm irəliləyişə nail olunduğunu diqqətə çatdıran deputatlar ölkəmizin iqtisadiyyatının durmadan inkişaf etdiyini, əhalinin həyat səviyyəsinin yüksəldiyini, Ermənistan-Azərbaycan, Dağlıq Qarabağ münaqişəsi nəticəsində qaçqın və məcburi köçkünə çevrilmiş əhalinin yaşadıqları çadır şəhərciklərinin ləğv edildiyini və onların müasir tipli qəsəbələrə köçürüldüyünü, münaqişənin Azərbaycanın sürətli inkişafına mənfi təsir göstərdiyini, Minsk qrupunun həmsədrlərinin uzunmüddətli fəaliyyətlərinə baxmayaraq, münaqişənin indiyə qədər həll edilmədiyini, Azərbaycanın regionda lider dövlət olduğunu vurğulamışlar. Çıxış edənlər Prezident İlham Əliyevin rəhbərliyi altında ölkədə gedən mühüm dəyişikliklərdən bəhs etmiş, ölkədə korrupsiyaya qarşı ciddi mübarizə aparıldığını, məhkəmə və hüquq sahəsində islahatlar aparıldığını diqqətə çatdırmışlar. Bildirilmişdir ki, Azərbaycanla bağlı 8 dəfə müzakirələr aparıldığı halda, mənfi meyillərin daha çox müşahidə edildiyi bəzi ölkələrlə bağlı 3 dəfə müzakirələr aparılması Avropa Şurası üçün xoşagəlməz münasibətdir. Bu gün Azərbaycanın iqtisadi, siyasi sahələrdə sabit ölkəyə çevrildiyi xüsusi qeyd edilmişdir.
Ermənistanlı deputatlar öz ənənələrinə sadiq qalaraq ölkəmizə qarşı bəslədikləri hissi yenidən büruzə verərək avropalı deputatların çıxışlarında səslənmiş ərazi bütövlüyünün demokratiyanın inkişafına təsiri fikri ilə razılaşmadıqlarını, ölkəmizdə alternativ xidmətin olmadığını, Naxçıvandakı erməni abidələrinin dağıdılması kimi əsassız faktlar sadalamışlar. Erməni deputatların çıxışı sessiya iştirakçılarının narazılığına səbəb olmuşdur.
Azərbaycanlı deputatlardan Rafael Hüseynov və Gültəkin Hacıyeva Azərbaycanın qazandığı nailiyyətlərə görə, daha demokratik bir ölkəyə çevrilmək istiqamətində irəliləmək üçün Avropa Şurasından dəstək aldığını, xeyirxah tənqid və təhlilin kömək göstərməyin ən yaxşı üsul olduğunu qeyd etmişlər. Vurğulamışlar ki, azərbaycanlı deputatlar tərəfindən hazırlanmış sənədlərin digər ölkələrlə müqayisədə çox olmasının, müxtəlif problemlərlə əlaqədar Avropa Şurası tərəfindən məruzəçi təyin edilməsinin onların fəallığına dəlalət edir. Diqqətə çatdırılmışdır ki, Ermənistan tərəfindən işğal edilmiş ərazilərdə Azərbaycan xalqının tarixən yaratdığı və qoruyub saxladığı memarlıq, incəsənət abidələri, tanınmış şəxsiyyətlərə qoyulmuş heykəllər, yüzlərlə mədəni-maarif və təhsil ocağı ermənilər tərəfindən yerlə-yeksan edilmiş, Naxçıvanda və digər bölgələrdə yalnız alban abidələri mövcuddur, heç vaxt ermənilərə məxsus abidə olmamışdır.
Sessiyada gündəliklə bağlı qəbul edilmiş qətnaməyə düzəlişlərə dair müzakirələr keçirilmişdir. 22 düzəliş içərisində azərbaycanlı deputatların bütün təklifləri birmənalı olaraq qəbul edilmiş, erməni deputatların 5 təklifinin heç biri keçməmişdir.
Sessiya öz işini davam etdirir.

Azərbaycan.- 2008.- 25 iyun.- S . 4.