Tarixi-memarlıq abidələrinin siyahısı təsdiqlənib

Nazirlər Kabineti "İçərişəhər" Dövlət Tarix və Memarlıq Qoruğu İdarəsinin balansında olan tarixi-memarlıq abidələrinin, bina və tikililərin siyahısını təsdiqləyib. Siyahıya 29 abidə, dövlət mülkiyyətinə məxsus qeyri-yaşayış binası, tikilinin adı daxil edilib. Bununla yanaşı, siyahıda 88 qeyri-yaşayış binası və binaların qeyri-yaşayış sahələrinin, yaşayış evlərinin adı var. Beləliklə, "İçərişəhər" qoruğunun balansında "Azərxalça" elm-istehsalat birliyinin binasının, Milli Ensiklopediyanın binası, "Bakıelektrikşəbəkə"nin Səbail idarəsinin yerləşdiyi memarlıq abidəsi, 5 saylı qaz xidməti sahəsinin yerləşdiyi binanın qeyri-yaşayış sahəsi, AMEA-nın Milli Folklor İnstitutunun yerləşdiyi binanın qeyri-yaşayış sahəsi, muzey əşyalarının bərpa mərkəzinin yerləşdiyi "Bəylər" məscidi, Şirvanşahlar Sarayının müdiriyyətinin yerləşdiyi bina, "Azərbərpa"nın binası, Bakı Şəhər Mədəniyyət İdarəsinin binası, "Muğam" teatrının yerləşdiyi karvansara, "Buta" teatr-studiyasının binası, 46 saylı uşaq bağçasının binası, Mədəniyyət və Turizm Nazirliyinin bədii sərgi salonunun yerləşdiyi bina, Səbail Rayon Polis İdarəsinin 19 saylı polis sahə məntəqəsinin binası, Milli Sülh Komitəsinin binası, "Karvansara" restoranının yerləşdiyi karvansara, "Qız qalası" abidəsi, Şirvanşahlara aid memarlıq abidələri, MSK-nın Seçkilər İnformasiya Mərkəzinin binası, Arxeologiya və Etnoqrafiya İnstitutunun muzeyinin binası, Ekologiya və Təbii Sərvətlər Departamentinin idman klubunun binası, "Təkiyə" memarlıq abidəsi, 633 saylı aptekin yerləşdiyi "Qasım bəy" hamamının da adı var. Həmçinin siyahıya kilsə, karvansara, Dördbucaqlı qala, "Hacı Heybət" məscidi, "Hacı Banu" məscidi, "Bəylər" məscidi, "Çin" məscidi, "Ağa Mikayıl" hamamı, "Gileyli" məscid, digər məscidlər, yaşayış evləri, yeraltı tikililər, qeyri-yaşayış binaları salınıb.

Kaspi.- 2008.- 26-27 iyun.- S. 15..