Qaliblər mükafatlandırılmışdır

 

Vergilər Nazirliyi 31 may 2008-ci il tarixdə Tofiq İsmayılov adına Uşaq - Gənclər Yaradıcılıq Sarayının "Uşaq Dünyası" Qalereyasında 1 İyun - Uşaqları Beynəlxalq Müdafiə günü ilə əlaqədar "Vergilər uşaqların gözü ilə" adlı rəsm müsabiqəsi keçirmişdir.

Mükafatlandırma mərasimində çıxış edən Tofiq İsmayılov adına Uşaq - Gənclər Yaradıcılıq Sarayının müdiri Bədayə Ramazanova qalibləri təbrik etmiş və belə bir ənənənin yaradılmasına görə Vergilər Nazirliyinə minnətdarlığını bildirmişdir.

Vergilər Nazirliyinin Vergi ödəyicilərinə xidmət İdarəsinin rəisi Elçin Məmmədov bu müsabiqənin artıq bir ənənə halını aldığını bildirmişdir. Qeyd etmişdir ki, ildən-ilə müsabiqədə nümayiş etdirilən rəsmlərin sayı artır və təqdim olunan işlər daha maraqlı olur.

İdarə rəisi vurğulamışdır ki, belə müsabiqələr uşaqların dövlətçilik haqqında anlayışlarının genişlənməsinə, büdcə və vergilər haqqında biliklərinin artmasına imkan yaradır. E.Məmmədovun fikrincə, bu əsərlərdə formalaşan kiçik təsəvvürlər gələcək üçün böyük təməldir.

Əvvəlki müsabiqələrdə iştirak etmiş rəsm əsərlərinin hazırda Vergilər Nazirliyinin inzibati binasının divarlarını bəzədiyini diqqətə çatdıran idarə rəisi gənc nəslin vergilər haqqında anlayış və biliklərinin artırılması, gələcəyin potensial vergi ödəyicilərinə vergi mədəniyyətinin aşılanması istiqamətində tədbirlərin bundan sonra da davam etdiriləcəyini söyləmişdir.

Vergilər Nazirliyinin Aparatının rəhbəri Asif Cahangirov müsabiqənin əhəmiyyətini vurğulamış və nazirliyin rəhbərliyi adından müsabiqə iştirakçılarını təbrik etmiş, onlara uğurlar arzulamışdır.

Sonra qaliblər qiymətli hədiyyələrlə mükafatlandırılmışdır.

 

Azərbaycan.- 2008.- 3 iyun.- S. 5.