Qaradağda Milli Qurtuluş Günü ilə bağlı silsilə tədbirlər keçirilmişdir

 

İyunun 14-də Milli Qurtuluş Günü münasibətilə Qaradağ rayonunun Lökbatan qəsəbəsində ulu öndərin adını daşıyan parkda Heydər Əliyevin abidəsinin açılışı olmuşdur.

Abidənin üzərindəki ağ örtük götürüldükdən sonra onun qarşısına əklillər və gül dəstələri qoyulmuşdur.

Açılış mərasimində çıxış edən Qaradağ Rayon İcra Hakimiyyətinin başçısı Hüseyn İsrafilov, Milli Məclisin deputatı Mixail Zabelin və digər natiqlər ümummilli lider Heydər Əliyevin şərəfli ömür yolundan, Azərbaycan xalqı qarşısındakı əvəzsiz xidmətlərindən söz açmışdır.

Sonra mərasim iştirakçıları 2 hektara yaxın ərazini əhatə edən parkda yeni inşa edilmiş Heydər Əliyev muzeyi ilə yaxından tanış olmuşlar. Təxminən 200 kvadratmetr ərazini əhatə edən bu muzeydə ümummilli liderin 250-dən artıq fotoşəkli onun haqqında yazılmış 300-dən çox kitab yer almışdır. Bundan sonra muzeyə üz tutan hər bir gənc dahi şəxsiyyətlə bağlı geniş məlumat əldə edə biləcəkdir.
Sonda YAP Qaradağ rayon təşkilatının əsaslı təmir edilmiş inzibati binasının açılışı olmuşdur.

Tədbirdə çıxış edən YAP sədrinin müavini-icra katibi, Milli Məclisin deputatı Əli Əhmədov mərasim iştirakçılarını 15 iyun - Milli Qurtuluş Günü münasibətilə təbrik edərək bildirmişdir ki, əsaslı təmirdən sonra istifadəyə verilən bu bina təşkilatın fəaliyyətinin daha da genişlənməsinə və qarşıdan gələn prezident seçkilərində partiya üzvlərinin fəal iştirakına təkan verəcəkdir.

Əli Əhmədov vurğulamışdır ki, bu il ölkəmizdə prezident seçkiləri keçiriləcəkdir. Bu seçkilərdə xalqımız öz səsini İlham Əliyevə verəcəkdir. Bununla da hər bir kəs özünün, ailəsinin övladının etibarlı, təminatlı gələcəyinə səs vermiş olacaqdır.

Azərbaycan.- 2008.- 15 iyun.- S. 2.