İstedadlı gənc skripkaçı
Səlim Abbasov musiqiçi ailəsində
dünyaya göz açıb. Atası
qarmon ustası olduğundan tez-tez onunla birgə konsert proqramlarına, el şənliklərinə
qatılıb. Musiqiyə
həvəs göstərdiyindən
onu musiqi məktəbinin kamança
sinfinə yazdırıblar:
"Mən çox böyük həvəslə
kamança sinfində
oxuya-oxuya Azərbaycanda
keçirilən müsabiqələrdə
iştirak edir və yüksək yerlər tuturdum. Orta məktəbi bitirdikdən sonra Asəf Zeynallı adına musiqi kollecinə daxil oldum və həmin
vaxtdan etibarən dövlət tədbirlərinə
də dəvət almağa başladım. Bu müddət ərzində ustad tarzən Ramiz Quliyevlə, onun oğlu Əyyub Quliyevlə birlikdə konsertlərdə çıxış
edirdim. Daha sonra Milli Konservatoriyanın
kamança sinfinə
qəbul oldum. Eyni vaxtda skripka
dərsləri də alırdım. Hər iki sahə üzrə
təhsilimi əla qiymətlərlə başa
vurduğum üçün
indi Milli Konservatoriyada, Siyavuş Kəriminin rəhbərliyi
altında müəllim
kimi çalışıram".
Xeyli
gənc olmasına baxmayaraq, məşhur
sənətkarımız, xalq artisti Zeynəb Xanlarovanın
rəğbətini qazanmasını və onunla birlikdə
çalışmasını S.Abbasov elə ilk
tanışlıqdan görkəmli müğənninin diqqətini
çəkməsilə izah edir: "Artıq neçə
illərdir ki, qarmon ustası Aftandil İsrafilovla birlikdə
çalışıram. Bir gün Aftandil müəllim məni özümə heç nə demədən Heydər Əliyev adına Saraya dəvət etdi. Orada məni böyük sənətkarımız
Zeynəb Xanlarovayla tanış etdilər. Demə, Zeynəb Xanlarova mənim ifamı efirdən izləyib və bəyənib. Buna görə də mənim onunla birgə çalışmağımı
istəyib. Və mənə elə gəlir ki, elə birinci görüşdən Zeynəb
xanımın rəğbətini
qazana bildim. Həmin vaxtdan Zeynəb xanımın ansamblında çalışıram,
onunla birlikdə konsertlərdə çıxış
edirəm. Keçən
il Zeynəb Xanlarovanın İstanbulun
"Bostançı" mərkəzində
çox möhtəşəm
konserti təşkil olundu. Mən də həmin konsertdə Zeynəb xanımı müşayiət
etdim. Zalda böyük bir coşqu vardı. Konsertdən sonra hər kəs yaxınlaşıb deyirdi
ki, belə bir möhtəşəm proqramı uzun illər öncə Zeynəb Xanlarovanın konserti zamanı izləmişdik. Bundan başqa, bu yaxınlarda Gəncədə
Röyanın solo konsertində, Bişkekdə
Heydər Əliyevin
85 illik yubileyi ilə əlaqədər tədbirlərdə çıxış
etmişəm. Bir müddət əvvəl Moldova prezidenti Azərbaycanda səfərdə
olarkən onun şərəfinə Muğam
Teatrındakı ziyafətə
dəvət almışdım.
Ziyafət bitəndən
sonra möhtərəm
prezidentimiz İlham Əliyev Moldova rəhbərinin mənim ifamı bəyəndiyini qeyd etdi. Təbii
ki, bu hadisə
mənim üçün
unudulmazdır. Çünki
ölkə prezidentindən
öz ifası haqqında yüksək fikirlər eşitmək hər sənətçiyə
nəsib olmur. Növbəti xarici səfərim Ukraynayadır.
Orada xüsusi bir proqramda çıxışım
nəzərdə tutulub".
Bu
gün sənət aləmində sponsorsuz, yaxşı
prodüsersiz populyarlıq qazanmağın
çətinliyindən danışan ifaçı efirdə
müntəzəm görünmək üçün
kifayət qədər maliyyə vəsaiti tələb
olunduğunu da vurğulayır: "Amma yaxşı ki, bu
gün mənim kimi sənətçiləri
təmənnasız efirə dəvət edən
kanallarımız da var. Hazırda gələcək sənət
fəaliyyətimlə bağlı
müəyyən planlarım
var. Elə bilirəm ki, onları həyata keçirsəm, sənət
aləmində daha da irəliyə gedəcəyəm. "Natiq"
ritm qrupu ilə birlikdə layihə, eyni zamanda, ifalarımdan ibarət albom üzərində çalışıram.
Klip çəkdirmək
niyyətim də var".
525-ci qəzet.- 2008.- 5 iyun.- S.7.