Avropa Şurası və üzv dövlətlər Heydər Əliyev Fondunun fəaliyyətini dəstəkləyirlər

Bakıda, "Mədəniyyətlərarası dialoqda qadınların rolunun genişləndirilməsi" mövzusunda keçirilən beynəlxalq forumla bağlı Azərbaycan nümayəndə heyətinin üzvü Qənirə Paşayevanın hazırladığı sənəd əsasında Avropa Şurası və üzv dövlətlər qadınların cəmiyyətdə rolunu yaxşılaşdırmaq üçün Heydər Əliyev Fondunun fəaliyyətinin dəstəklənməsi barədə qurumun yazılı bəyanatı yayılmışdır.
Bəyanatda deyilir: Parlament Assambleyasındakı məruzələrin birində üzv dövlətləri 2008-ci il 20 may tarixli 11612 saylı sənəddə göstərildiyi kimi, qadınların müasir cəmiyyətdə rolunu möhkəmləndirmək üçün müxtəlif konkret tədbirlər görməyə dəvət etdiyini nəzərə alaraq;
Qadınların bacarıqlarının inkişaf etdirilməsinin onların beynəlxalq aləmdəki rolunun yüksəlməsinə xidmət edəcəyini, Avropada, habelə dünyada sülh və sabitliyə xidmət edəcəyini anlayaraq;
Beynəlxalq məsələlərdə qadınların iştirakının vacibliyini əsas götürərək;
Mədəniyyətlərarası dialoqun təmin edilməsi üçün qadınların dialoqunun həyata keçirilməsi və intensivləşdirilməsində Heydər Əliyev Fondunun, xüsusən Fondun prezidenti Mehriban xanım Əliyevanın fəal rolunu nəzərə alaraq;
Heydər Əliyev Fondu tərəfindən Bakıda təşkil edilmiş və 60-a yaxın ölkə və beynəlxalq təşkilatlardan yüzlərlə tanınmış qadını, ictimai və dövlət xadimlərini, ekspertlərini bir araya gətirən və gender bərabərliyi, davamlı dialoqu, dözümlülüyü, ədaləti təmin etmək məqsədi ilə dövlət və vətəndaş cəmiyyətinə əllərindən gələni etməyə çağıran "Mədəniyyətlərarası dialoqda qadınların rolunun möhkəmləndirilməsi" mövzusundakı beynəlxalq forumu təbrik edərək;
Avropa Şurası və üzv dövlətlər qadınlara yardım proqramının inkişafını davam etdirməyə, onların bacarıqlarını möhkəmləndirməyə ən azından Heydər Əliyev Fondu və onun prezidenti Mehriban xanım Əliyeva tərəfindən bu məqsədlə aparılan fəaliyyətə yaxından dəstək və töhfə verməyə çağırılır.
Qənirə Paşayeva tərəfindən hazırlanmış bu sənədə 30-dan artıq ölkənin deputatı, o cümlədən Polşa, Türkiyə, Böyük Britaniya, Rusiya, Gürcüstan, Albaniya və digər dövlətlərdən olan millət vəkilləri imza atmışlar.

Azərbaycan.- 2008.- 26 iyun.- S. 9.