"Krım-2008"
Beynəlxalq kitabxana konfransından reportaj
Dünən Krım
Muxtar Respublikasının Respublika Mərkəzi Elmi
Kitabxanasında "Azərbaycan guşəsi"nin
təqdimat mərasimi keçirildi. Daimi fəaliyyət
göstərəcək guşədə Azərbaycanın
tarixi, mədəniyyəti, milli-mədəni irsi, habelə
müasir daxili və xarici siyasəti, neft strategiyası,
Dağlıq Qarabağ problemi, Azərbaycan muğamları
haqqında nəşrlər nümayiş etdirilir.
Təqdimatda
Azərbaycan Respublikası Mədəniyyət və Turizm
Nazirliyinin Kitabxana işi bölməsinin məsləhətçisi
Samir Abbasov "B.Çobanzadə
yaradıcılığı və Türk
dünyasının ortaq dəyərləri" mövzusunda
çıxış etdi. Sonra C.Cabbarlı adına Respublika
Gənclər Kitabxanasının direktoru T.Sadıqov və
F.Köçərli adına, Respublika Uşaq Kitabxanasının
direktoru F.Quliyeva çıxış etdilər. Tədbir
iştirakçıları türkoloq alim
B.Çobanzadənin anadan olduğu Qarasubazar
şəhərində onun şərəfinə
ucaldılmış abidənin açılışı
mərasimində və ədəbi-bədii gecədə
iştirak etdilər. Tədbirdə C.Cabbarlı adına
Respublika Gənclər Kitabxanası, F.Köçərli
adına Respublika Uşaq Kitabxanası Krım Muxtar
Respublikasının Elmi Kitabxanası və İ.Qasprinski
adına Krımtatar kitabxanası ilə
əməkdaşlığın inkişaf etdirilməsi
və təcrübə mübadiləsi sahəsində
razılıq əldə olundu. Tədbirin sonunda Krım Muxtar
Respublikasının Elmi Kitabxanası və İ.Qasprinski
adına Krımtatar kitabxanasına Azərbaycan haqqında
maraqlı kitablar hədiyyə edildi.
Azərbaycan
kitabxanaçılarının "Krım-2008"
Beynəlxalq konfransda iştirakı Təşkilat Komitəsi
tərəfindən yüksək qiymətləndirildi.
"Krım-2008"
Beynəlxalq kitabxana konfransı Azərbaycan kitabxanaçılarına
qarşılıqlı əməkdaşlıq,
təcrübə mübadiləsi və s. sahələrdə
geniş imkanlar açır. Konfransda müxtəlif
maraqlı dəyirmi masalar, debatlar, kitab təqdimatları oldu.
Burada Avstriya, Macarıstan, Böyük Britaniya, Rusiya, Kanada,
İordaniya, Azərbaycan, Belarus, Ukrayna, Qazaxıstan
kitabxanalarının müasir dövrdə kitabxana işi
sahəsində fəaliyyəti, kitabxanaların avtomatlaşdırılması,
yeni xidmət növlərindən istifadə və s. mövzularda
dəyirmi masalar və debatlar keçirildi.
"Krım-2008" Beynəlxalq
kitabxana konfransının müxtəlif bölmələrində
F.Köçərli adına Respublika Uşaq Kitabxanasının
direktoru, əməkdar mədəniyyət işçisi
Fizurə xanım Quliyeva "Azərbaycanda uşaq kitabxanalarının
prioritetləri və oxucuların mütaliə
maraqları", C.Cabbarlı adına Respublika Gənclər
Kitabxanasının direktoru Tahir Sadıqov "Azərbaycanda
ictimai hüquqi-informasiya mərkəzləri: ilk
təcrübə və problemlər", Gəncə
şəhər MKS-nin direktoru Elmira xanım Əliyeva isə
"Region kitabxanalarının
informasiyalaşdırılması - zamanın
tələbidir" mövzularında çıxış
etdilər.
Razılaşmaya
görə, C.Cabbarlı adına Respublika Gənclər Kitabxanasının
fəaliyyəti Müstəqil Dövlətlər Birliyi
ərazisində ən çox oxunan "Biblioteka v şkole"
qəzetində işıqlandırılacaq.
Konfransın
Təşkilat Komitəsinin təklifi ilə Azərbaycan
Respublikası Mədəniyyət və Turizm Nazirliyinin
layihəsi ilə nəşr olunmuş "Kitabxanalar
biliklər cəmiyyətində. Biblioteki v obhestve znaniy"
ikidilli kitabın müzakirəsinə dair "Dəyirmi
masa" keçirilib. "Dəyirmi masa"da MDB
ölkələri, habelə Böyük Britaniya, Fransa,
ABŞ, Avstriya, Almaniya, İsrail, Finlandiya, Kanada, Misir,
Hindistan, Çin və s. ölkələrin kitabxana
mütəxəssisləri iştirak ediblər.
Mədəniyyət.- 2008.- 14 iyun.- S. 4.