Naxçıvanda əl işlərindən ibarət sərgi

Naxçıvanda ahıl və əlil vətəndaşların əl işlərindən ibarət satış sərgisi təşkil olunub. MR Əmək və Əhalinin Sosial Müdafiəsi Nazirliyindən APA-ya verilən məlumata görə, sərginin təşkili regionda bu qəbildən olan insanların məşğuliyyətini təmin etmək və maddi vəziyyətini yaxşılaşdırmaq məqsədi daşıyır. Dünən rəsmi səviyyədə sərginin açılışı keçirilib. Tədbirdə çıxış edən Naxçıvan MR-in əmək və əhalinin sosial müdafiəsi naziri Cavid Səfərov bölgədə ahıl və əlillərin sosial müdafiəsi istiqamətində görülən işlərdən danışıb, son üç ayda 53 əlil və ahıl vətəndaşla müqavilə bağlandığını, toxunan 5200 ədəd yun corabın müxtəlif hərbi hissələrə göndərildiyini bildirib. MR Rəssamlar Birliyinin B.Kəngərli adına sərgi salonunda baş tutan satış sərgisinə 17 əlilin 82 adda rəsm əsəri, 23 ahılın 32 əl işi çıxarılıb. Sərgi həftə sonunadək davam edəcək.

Palitra.- 2008.- 12 mart.- S. 2.