Mükərrəmoğlu M.

Təcrübəli bəstəkarın “Bahar nəğməsi”

Son illər Novruz bayramı ərəfəsində kütləvi informasiya vasitələrində, xüsusən, televiziya verilişlərində belə bir fikir səsləndirilir ki, bahar mövzusunda yeni mahnılar yazılmır. Hətta, ən yaxşı ifaçıların da repertuarında yeni mahnının olmamasını irad kimi söyləyənlər də tapılır.
Bahar və təbiət mövzulu çoxsaylı mahnıların müəllifi, “Şöhrət” ordenli bəstəkar, Xalq artisti Tofiq Bakıxanov hər il olduğu kimi builki bahar bayramını da yeni musiqi əsəri ilə qarşılayır. Bəstəkarın “Bahar nəğməsi” adlı yeni mahnısının (Sözləri İttifaq Mirzəbəylinindir) qəhrəmanı ətrafdakı bütün varlığı bahar kimi, əsrarəngiz şəkildə görür:
“Pəncərəniz səhərdən
Qönçə idi, gül oldu.
Ağ əllərin toxundu,
Pərdələr tel-tel oldu".
Respublikanın xalq artisti Teymur Mustafayevin repertuarına daxil edilmiş “Bahar nəğməsi” mahnısının bu günlərdə tamaşaçılara və dinləyicilərə təqdim ediləcəyi gözlənilir.,

Xalq qəzeti.- 2008.- 16 mart.- S. 7.