Qaliboğlu E.

"Arif Babayev səhnəyə Məcnun kimi gəlib"
Opera və Balet Teatrında Arif Babayevin 70 yaşı qeyd edildi

Srağagün Opera və Balet Teatrında xalq artisti, professor Arif Babayevin 70 illiyinə həsr olunmuş tədbir keçirildi. Əvvəlcə sənətkarın həyat və yaradıcılıq yolunu əks etdirən süjet nümayiş olundu. Mədəniyyət və Turizm naziri Əbülfəs Qarayev çıxışında Arif Babayevin Azərbaycan muğam sənətinin inkişafındakı özünəməxsus xidmətlərindən danışdı, onun hələ bundan sonra da musiqi mədəniyyətimizə yeni-yeni töhvələr verəcəyinə əminliyini bildirdi: "Təbiət Arif Babayevdən heç nə əsirgəməyib. Bu gün əslində Azərbaycan muğam sənətinin böyük bayramıdır. Arif Babayev 50 ildir ki, Azərbaycan muğam sənətinin ifaçısı kimi son dərəcə əhəmiyyətli bir işlə məşğuldur. Arif Babayevin xoşbəxtliyi ondadır ki, 20 yaşlarında olduğu kimi indi də muğam sənətinin pərəstişkarlarını bənzərsiz səsiylə heyran etməkdədir.
Hər sənətkara bu, müyəssər olmur. Bu günlərdə Arif Babayev
Azərbaycan dövlətinin ali mükafatına - "İstiqlal" ordeninə layiq görülüb. Azərbaycan incəsənət xadimləri, mədəniyyət işçiləri adından sənətkarı təbrik edir, ona yeni-yeni müvəffəqiyyətlər arzulayıram. Bu gün Azərbaycanda muğam sənəti özünün yeni bir inkişaf məhələsini yaşayır. Arif Babayev muğam sənəti sahəsində ilk dəfə professor olmuş pedaqoqdur. O, xoşbəxtdir ki, özünün bu sənətdə ardıcıllarını yetirib".
Tədbirin aparıcısı yazıçı-publisist Mustafa Çəmənli Arif Babayevin sənətkar kimi bənzərsizliyindən danışdı: "Arif Babayev Azərbaycan muğam sənətinin görkəmli nümayəndələrindən biridir. Sənətdə onillərlə qərar tutub qalmaq hər sənətkara nəsib olmur. O qədər bir mahnısıyla könülləri ovsunlayıb sonradan unudulanlar olub ki...

Arif müəllim bu sənətin hər cəfasına dözüb, çətin günlərində sənətindən güc alıb, muğam da ona daim yeni güc verib.
Arif Babayev gəncliyində olduğu kimi indi də xalq tərəfindən sevilir. Xalqın ürəyinə yol tapmaq asan məsələ deyil, Azərbaycan musiqili teatrının tarixində çoxlu Məcnunlar olub, bunların hər biri xalq təəfindən yüksək dəyərləndirilib. Mübaliğəsiz demək olar ki, Arif Babayevin Məcnunu heç kəsinkinə bənzəməyib. Onun Məcnunu daha yaddaqalandır. Arif Babayev Məcnun rolunu o qədər məharətlə canlandırıb ki, vaxtilə Üzeyir Hacıbəyli haqqında "Uzun ömrün akkordları" filmi çəkilərkən Arif Babayevin" Leyli və Məcnun" operasındakı çıxışından fraqment də ora daxil edilib. Arif müəllim bu səhnədə ömür qoyub, neçə-neçə gəncə muğam sənətinin əsrarəngiz sirlərini öyrədib. Ay dolanır, il ötür, zaman gəlir ki, sənətkar səhnəni təbii şəkildə tərk edir. Heyləməli, bu, təbiətin qanunudur. Arif müəllim səhnəmizə Məcnun kimi gəlib, Məcnun kimi də səhnəni tərk edir. Arif Babayev xoşbəxt sənətkardır, ona görə ki, sənətini yaşadan neçə-neçə ardıcılını yetişdirib. 28 ildir ki, pedaqoji fəaliyyətlə məşğuldur. O, pedaqoji fəaliyyətə Bülbül adına Musiqi Məktəbində başlayıb. Sonrakı illərdə Arif Babayev fəaliyyətini indiki Bakı Musiqi Akademiyasında davam etdirib".

Tədbirdə çıxış edən xalq artisti Habil Əliyev Arif Babyevin sənətini yüksək dəyərləndirdi: "Arif Babayev xalqımız tərəfindən sevilən sənətkarlardandır. O, hələ gənc yaşlarından istedadlı bir xanəndə kimi püxtələşdi, bu gün də sənətini davam etdirir. Onunla birgə çoxlu el şənliklərində olmuşam. Həmişə belədə özümü çox arxayın hesab edirdim, əmin idim ki, camaat bizdən razı qalacaq. Mən çoxlu sənətkarlarla işləmişəm, onları müşaiyət etmişəm. Arif həmişə zəngulələri, muğama dərin bələdliyi ilə məni heyran edib. Arifin ürəyində bu gün də böyük arzuları var. Arzu edirəm ki, o, bütün istəklərinə çatsın. Təbiət ona gözəl səs bəxş edib".

Xalq artisti Afaq Bəşirqızı: "Arif Babayev Azərbaycan muğam sənətinin xəzinədarıdır. Mən onu xoşbəxt sənətkar sayıram.

O, bu gün əməyinin bəhrəsini görür. Gün o gün olsun ki, Arif müəlim Qarabağda "Qarabağ şikəstəsi"ni oxusun".

Xalq artisti Ağaxan Abdullayev: "Arif Babayev xalqımızın böyük sənətkarıdır. Onun böyük ürəyi var, dostluğa sədaqətlidir. Onunla dostluq etdiyimə görə çox xoşbəxtəm.

Qarabağın azad olunması Arif müəllimin ən böyük arzusudur".
Konsert boyunca Səkinə İsmayılova, Mənsum İbrahimov, Gülüstan Əliyeva, Feyruz Səxavət, Səbuhi İbayev və başqaları maraqlı konsert proqramı ilə çıxış etdilər.

Xalq cəbhəsi.- 2008.- 14 mart.- S. 14.