Qaliboğlu E.

Ələsgər ocağı ilə bağlı yaradılmış dastan-rəvayətlər...

Bu günlərdə məşhur el sənətkarı Aşıq Ələsgərə həsr olunmuş "Ələsgər ocağı ilə bağlı yaradılmış dastan-rəvayətlər haqqında" kitabı işıq üzü görüb. Kitabın müəllifi, Aşıq Ələsgərin nəvəsi, tədqiqatçı İslam Ələsgər sözügedən mövzuya müraciət etməsinin təsadüfi olmadığını, zərurətdən yarandığını bildirir: "Aşıq Ələsgərin həyat və yaradıcılığı ilə bağlı xalq arasında müxtəlif məzmunlu söz-söhbətlər mövcuddur. Bunların bir qismi Ələsgərin həyatında baş vermiş hadisələr və bu hadisələr səbəbilə deyilmiş şerlərdən ibarətdir. Dastan söyləyən aşığın bir az bəzək-düzəyi olsa da, bunlar sənətkarın həyat və yaradıcılığını öyrənmək baxımından xüsusi əhəmiyyətə malikdir. Bu əhvalatlar Ələsgərin gənclik illərindən başlayaraq xronoloji ardıcıllıqla ömrünün son illərinə qədər onun həyatının müəyyən məqamlarını əks etdirir. Aşığın həyatı ilə əlaqələndirilərək söylənilən hadisələrin bir qismi isə reallıqdan çox uzaqdır. Burada nağıllanan əhvalatlar ağlasığmayan uydurmalardan quraşdırılıb. Bunların bir çoxunda hamıya məlum olan hadisələr bilərəkdən təhrif edilib. Təəssüf ki, belə qəbuledilməz söyləmələrdən çoxu müxtəlif mətbuat səhifələrində özünə yer tapıb".
Tədqiqatçı Aşıq Ələsgərin həyatı və yaradıcılığı ilə bağlı yaranmış söyləmələri iki qismə ayırır: real həyat hadisələri əsasında yaradılmış dastan-rəvayətlər, xəyalən yaradılmış "dastanlar": "Aşıq Ələsgər o qədər də uzaq keçmişin adamı deyil. Onun barəsində söylənilənlərin həqiqəti ilə yalanını biri-birindən asanlıqla ayırmaq mümkündür. Unudulmamalıdır ki, yazdıqlarımız bugünkündən daha çox gələcək nəsillər üçündür. Gələcək nəsilləri isə bugünün həqiqətləri daha çox maraqlandıracaq. Odur ki, həqiqətləri bir kənara qoyub Aşıq Ələsgər haqqında yalan söz-söhbətləri yazıya almaq onun ruhu qarşısında böyük günah olduğu kimi, həm də elmi cinayətdir. Təəssüf ki, bir çoxları aşıq haqqında belə yalan və böhtanları xalq arasından toplamır, evində, kabinetində uydurur, hətta onun dilindən şeir "yaratmaqdan" da çəkinmir. Belə hallar gələcəkdə böyük dolaşıqlığa səbəb ola bilər və olacaq. Atalar yaxşı deyib ki, ziyanın yarısından qayıtmaq da xeyirdir".

Xalq cəbhəsi.- 2008.- 14 mart.- S. 14.