Gənclər Teatrı:
əzəli ənənələr əbədi
dəyərlərə çevrilir
Hazırda Azərbaycanın ən nüfuzlu teatr kollektivləri sırasında
yer alan Dövlət Gənclər
Teatrının yaranması
və inkişafı mərhum rejissor, görkəmli sənətkar
Hüseynağa Atakişiyevin
adı ilə bağlıdır. H.Atakişiyevin
vəfatı ilə əlaqədar bu teatrın işində böhran yaranacağı,
hətta fəaliyyətini
dayandıracağı barədə
bədbin proqnozlar səslənirdi. Ancaq kollektiv bütün gücünü toplayaraq ayaqda qala bildi.
Bununla də həm mərhum sənətkarımızın ruhuna
ehtiramını göstərdi,
həm də öz sənət yoluna davam etdi.
Gənclər Teatrının
direktoru Həsən Həsənov bizimlə söhbətində H.Atakişiyevin
vəfatından sonra ciddi çətinliklərlə
üzləşdiklərini, kollektivin bu itkini dərin kədərlə qarşıladığını
bildirdi: "Onun yoxluğu hər birimizə çox pis təsir etdi, teatrın kollektivi xeyli vaxt sarsıntı içərisində qaldı.
Amma biz bu vəziyyətdən çıxmağı, bütün
imkanlarımızı səfərbər
edərək teatrı
yaşatmağı bacardıq.
Teatr sənətinə,
bizim kollektivə yaxından bağlı olan Rəhman Əlizadə 2006-cı ilin iyulunda buraya
baş rejissor təyin edildi. Həmin tarixdən də mən Teatrın direktor vəzifəsində çalışıram.
Biz əl-ələ verərək, kollektivlə birgə çalışaraq Gənclər
Teatrının böhran
keçirməsinə imkan
vermədik. Qısa müddətdən sonra kollektiv yenidən öz yaradıcılıq
yolunu uğurla davam etdirməyə başladı". Teatrın
bina probleminin hələ də həllini tapmadığını deyən H.Həsənov
dəfələrlə bu
məsələnin üzərinə
gəlindiyini, ancaq indiyədək qəti bir qərar verilmədiyini vurğuladı.
Direktorun sözlərinə
görə, qarşılaşdıqları
çətinliklərə baxmayaraq, kollektiv öz işini lazımi səviyyədə
qurmağa səy
göstərir: "Son
dövrdə bir neçə uğurlu tamaşa hazırlayıb təhvil vermişik. Təbii ki, bu ilk növbədə
kollektiv üzvlərinin,
yeni rəhbərliyin və Teatrın hər bir işçisinin
zəhmətinin bəhrəsidir.
Bu yaxınlarda Rəhman Əlizadə Hüseyn Cavidin 125 illiyi münasibətilə
dramaturqun "İblis"
əsərini tamaşaya
qoydu və ilk olaraq bizim
teatrda İblis rolunu qadın - istedadlı aktrisa Nəsibə Eldarova ifa etdi. Artıq
bu tamaşa üç dəfə oynanılıb".
Direktorun sözlərinə
görə, Teatrın
öz dəsti-xəttinə uyğun olaraq burada gənclərin
yaradıcılığına xüsusi meydan verilir: "Gənclərdən
Sərvər Əliyev
son vaxtlar uğurlu tamaşalar hazırlayıb. Dörd gənc aktyoru kollektivə qəbul etmişik. Onlar da teatr truppasına
alışıb, öz
yerlərini möhkəmləndiriblər,
artıq 3-4 yeni tamaşada iştirak ediblər. Biz gənc aktyorlara böyük ümid bəsləyirik. Gənc sənətçilərə qayğı
sahəsində teatrın
əzəli prinsiplərinə,
dəyərli ənənələrinə
sadiq qalaraq işimizi davam etdiririk".
H.Həsənovdan
öyrəndik ki, Gənclər Teatrı 2008-ci ildə 5
tamaşa hazırlamağı nəzərdə tutur. Bunlar "Tarelkinin ölümü", "Sara
Xatun", "Cənnətin
çəmənliyi", "Bir iş gör..."
və "Bir dön, geriyə bax" adlı tamaşalar olacaq.
525-ci qəzet.- 2008.- 7 mart.- S. 7.