Abdullayeva F.

 

Mədəniyyət və Turizm Nazirliyi beynəlxalq səviyyəli layihələrin sayını artırır

 

Əbülfəs Qarayev: “Əsas məqsədimiz Azərbaycan mədəniyyətinin dünyada layiqli təmsilinə nail olmaqdır”

 

Martın 14-də Mədəniyyət və Turizm naziri Əbülfəs Qarayev son aylar nazirliyin gördüyü işlərlə bağlı mətbuat konfransı keçirdi. Hesabat xarakteri daşıyan tədbir Yeni Azərbaycan Partiyasının qərargahında reallaşdı.

Son vaxtlar Azərbaycan Respublikası Mədəniyyət və Turizm Nazirliyi tərəfindən bir neçə beynəlxalq səviyyəli layihənin həyata keçirilməsinə xüsusi önəm verildiyini deyən nazir iki böyük layihə haqqında məlumat verdi: "Bildiyiniz kimi, mən bu yaxınlarda iki ölkədə səfərdə olmuşam. Bunlardan biri İngiltərə Mədəniyyət və Turizm Nazirliyinin dəvəti və bu ölkənin Azərbaycandakı səfirliyinin köməyi ilə reallaşdı. Onu da bildirim ki, Azərbaycan Respublikasının mədəniyyət tarixində ilk dəfə idi ki, Azərbaycanın Mədəniyyət və Turizm naziri bu ölkəyə rəsmi səfərə gedirdi. 4 gün davam edən səfər çərçivəsində Azərbaycanla İngiltərə arasında həm mədəniyyət, həm də turizm sahəsində geniş və perspektivli layihələrin gerçəkləşməsinə əsas verə biləcək danışıqlar aparıldı. Əsas olan bu oldu ki, Birləşmiş Krallığın mədəniyyət, yaradıcı sənayelər və turizm naziri xanım Marqaret Hocla görüşdüm. Bu görüşdə Azərbaycanla İngiltərə arasında mədəniyyət və turizm sahəsində sazişin imzalanmasına dair işin başlanması haqqında bəyanat verildi. Biz aramızda niyyət protokolu imzaladıq və yaxın 1 il ərzində çoxsahəli əməkdaşlıq haqqında protokolun hazırlanmasına başlandı. Xüsusilə marağımızı cəlb edən bu ölkənin muzeylərinin və kitabxanalarının fəaliyyəti oldu. Qeyd edim ki, bizdən fərqli olaraq onlarda bu sahənin fəaliyyətinə nəzarət yerli icra orqanları tərəfindən həyata keçirilir. Bu bizdə Azərbaycanda çox böyük islahatların aparılmasına ehtiyacın olması haqda fikirlər oyatdı və artıq bu ölkənin mütəxəssislərinin ölkəmizə dəvət olunması məsələsini həll etmişik". Mədəni irsin qorunması ilə bağlı İngiltərə təcrübəsinin Azərbaycanda tətbiq edilməsinin vacibliyindən danışan Ə.Qarayev bu sahədə dünyada ən qabaqcıl təcrübənin onlarda olmasını bildirdi: "Oranın həm qədim dövrdən, həm orta əsrlərdən qalmış, həm də müasir memarlığı əks etdirən mədəni irsin qorunması məsələsi nazirliyin bilavasitə diqqətindədir və bu yöndə çox maraqlı layihələr həyata keçirilməkdədir. Bu sahə üzrə mütəxəssislərin də Azərbaycana dəvət edilməsi məsələsini həll etmişik. Artıq "English Herelhech" şirkətinin və Arxeologiya İnstitutunun mütəxəssislərinin Azərbaycanda yeni yaradılmış qoruqların təhlilinə və tədqiqatlarına dəvət edilməsi qərara alınıb. Onlar Azərbaycanda bu il keçiriləcək islam və şəhərsalma mövzusunda beynəlxalq konfransın da iştirakçıları olacaqlar. Əlavə olaraq bildirmək istərdim ki, Azərbaycanda bir neçə böyük sərgilərin keçirilməsi, Britaniya muzeyində xalqımızın tarixi ilə bağlı olan əşyaların müəyyənləşdirilməsi və bu əşyaların məhz Azərbaycan xalqına məxsus olması məsələsi müzakirə olundu. Artıq birgə yaradılan qrup bu il öz işinə başlayacaq. Növbəti ildə Azərbaycanda keçiriləcək tədbirlər sırasında Viktoriya və Albert muzeylərinin bir neçə tədbirinin keçirilməsi də nəzərdə tutulub". Ə.Qarayevin dediyinə görə, başçılıq etdiyi nümayəndə heyəti İngiltərədən birbaşa Mərakeşdə İSESKO-nun Baş qərargahında keçirilən Azərbaycan mədəniyyətinin təqdimatı mərasiminə yollanıb. Tədbirdə Bakıdan gedən 140 nəfər sənətçi də iştirak edib. Nazir onu da bildirdi ki, tədbir Heydər Əliyev Fondunun prezidenti Mehriban xanım Əliyevanın şəxsi təşəbbüsü ilə Heydər Əliyev Fondu və Mədəniyyət və Turizm Nazirliyi tərəfindən reallaşıb: "Tədbir çərçivəsində 2 sərgi, bir böyük qala-konsert, jurnalistlərlə ayrıca görüş keçirildi ki, bu da Mərakeşdə mədəniyyətimizin daha yaxından tanınmasına və ümumiyyətlə bu ölkənin insanlarında Azərbaycan haqqında xoş təəssüratların yaranmasına səbəb oldu. Bundan əlavə, prezident İlham Əliyevin mənə verdiyi səlahiyyətlər əsasında Mərakeşdə bu ölkənin Mədəniyyət və Turizm Nazirliyi ilə dövlətlərarası müqavilələr imzalandı. Bu müqavilələr mədəniyyət və turizm sahəsində əməkdaşlığı nəzərdə tutur. Tədbir Mərakeş mətbuatında çox geniş işıqlandırıldı. Qeyd edim ki, ümumiyyətlə bizim bu ölkədə keçirdiyimiz görüşlər böyük marağa səbəb oldu. Qərara gəlmişik ki, 2009-cu ildə Azərbaycanda Mərakeş Mədəniyyəti Günləri keçirilsin. 2010-cu ildə isə Azərbaycanın Mədəniyyət Günləri bütün Mərakeş ərazisində keçiriləcək".

Mərakeş səfərinin əhəmiyyətindən danışan Ə.Qarayev onu da bildirdi ki, İSESKO-nun Baş qərargahında qurumun baş katibi cənab Əbdüləziz əl-Tüveycri ilə geniş danışıqlar aparıb: "Danışıqların gedişində 2009-cu ildə Bakının islam ölkələrinin mədəniyyət paytaxtı elan edilməsi çərçivəsində paytaxtımızda keçiriləcək bütün tədbirlərin proqramı müəyyənləşdirildi. Qeyd edim ki, 2009-cu il maraqlı tədbirlərlə zəngin olacaq. Bu ilin əsas özəlliyi təkcə Bakının İslam dünyasının paytaxtı kimi tanınması yox, ümumiyyətlə, Azərbaycanın sivilizasiyalar arasında körpü rolunu oynamağa qadir ölkə, mədəniyyətlərin mübadiləsinə xidmət edə biləcək bir məkan olmasının həm İSESKO, həm də Avropa Şurası tərəfindən qəbul olunmasıdır ki, bu da bizi sevindirməyə bilməz".

Nazir Mərakeşdən qayıtdıqdan sonra Bakıda Avropa Şurasının Mədəniyyət, təhsil, səhiyyə, gənclərlə iş və elm departamentinin müdiri Robert Palmerlə görüşdüyünü dedi, AŞ nümayəndəsinin ölkəmizə gəlməsinin əsas səbəbini açıqlayan Ə.Qarayev bildirdi ki, bu səfər Bakıda keçiriləcək Avropa ölkələri nazirlərinin toplantısına hazırlıq məqsədi daşıyır: "Martın axırında və ya aprelin əvvəlində Avropa Şurasının Xarici İşlər Nazirləri Komitəsində uzun fasilədən sonra Avropa ölkələrinin mədəniyyət nazirlərinin toplantısını keçirmək haqqında qərar qəbul edildi. 8-9 ildir Avropa ölkələrinin mədəniyyət nazirlərinin toplantısı keçirilmir. Bu toplantının Azərbaycanda keçirilməsi üçün artıq müraciət etmişik".

Sonda nazir onu da bildirdi ki, bu layihələri həyata keçirməkdə əsas məqsəd beynəlxalq səviyyədə Azərbaycan mədəniyyətinin təmsil olunmasına və xalqımızın zəngin tarixi ənənələrinin dünyaya tanıdılmasına nail olmaqdır. Eyni zamanda 2008-2009-cu illərdə keçiriləcək bütün tədbirlər Azərbaycanın yeni müasir və zəngin mədəniyyətə malik ölkə imicini formalaşdırmaq məqsədi daşıyır.

 

Mədəniyyət.- 2008.- 15 mart.- S. 3.