Milli Kitabxanada "Maraqlı
insanlarla görüş"
olacaq
Son zamanlar M.F.Axundov adına Milli Kitabxananın fəaliyyətində bir sıra yeniliklər nəzərə çarpır.
Bununla bağlı Kitabxananın direktoru Kərim Tahirovla görüşüb, görülən
işlər barədə
məlumat aldıq.
K.Tahirov bildirdi
ki, 2008-ci ildə bütövlükdə kitabxananın
yenidən qurulması
və oxuculara daha müasir formada xidmət göstərməsi sahəsində
bir sıra tədbirlər həyata keçirilib. Bu tədbirlərdən əsas
məqsəd daha çox oxucunun kitabxanaya cəlb olunmasıdır. Artıq
Milli Kitabxana oxuculardan virtual kitab sifarişi qəbul edir. Bundan başqa, kitabxanada "Turizm" və "Dağlıq Qarabağ" guşələri
yaradılıb. Məlum
məsələdir ki,
hər iki mövzu Azərbaycanın
müasir həyatı
üçün çox
aktualdır. "Turizm"
guşəsində ölkəmizlə
bağlı turistləri
maraqlandıra biləcək
materiallar yerləşdirilib.
"Dağlıq Qarabağ"
guşəsində isə
Azərbaycanın işğal
edilmiş rayonları,
Qarabağ savaşı
zamanı şəhid
olan insanlar haqqında məlumatlar öz əksini tapıb. Bu guşələrin yaradılması
ilk növbədə təbliğat məqsədilə
atılan addımdır.
Kitabxanada yaxın gələcəkdə daha
2 yeni guşənin təşkili nəzərdə
tutulub.
Milli Kitabxana Azərbaycan
Yazıçılar Birliyi
(AYB) ilə bərabər
gənc yazarların yeni işıq üzü görmüş
kitablarının silsilə
müzakirələrini təşkil
edəcək və ilin sonunda münsiflər
heyəti ən yaxşı 2 kitabın müəllifinin adlarını
açıqlayacaq.
Diqqəti çəkən
layihələrdən biri
də Kitabxanada "Maraqlı insanlarla görüş" klubunun
yaradılması ilə
bağlıdır. Tezliklə
təşkil ediləcək
bu klubda nisbətən yaşlı
ziyalılarla gənclərin
görüşü planlaşdırılıb:
"Biz 2008-ci ili
"Oxucularla canlı
təmas ili" elan etmişik və martın sonunda Oxucu günü
keçirmək niyyətindəyik.
Həmin gün Kitabxananın müdiriyyəti
oxucuların iradları
və məsləhətlərilə
tanış olacaq. Çünki Kitabxananın
işinin təkmilləşməsində
oxucu fikri çox önəmlidir. Bu görüşlər bir növ sosioloji
sorğu xarakteri daşıyacaq".
Rəhbərlik kitabxananın beynəlxalq
əlaqələrini genişləndirmək
fikrindədir. Artıq
bu istiqamətdə müəyyən addımlar
atılıb. Böyük
Britaniya, Niderland, Almaniya və Finlandiya Milli kitabxanalarıyla əlaqələr
yaradılıb, onların
iş metodlarının
öyrənilməsi və
tətbiqi nəzərdə
tutulub. K.Tahirovun sözlərinə görə,
yaxın zamanlarda Milli Kitabxananın bütün avadanlıqlarının
yenilərilə əvəzlənməsi
də planlaşdırılıb.
525-ci qəzet.- 2008.- 8 mart.- S. 25,