Martın 15-də
"Hyatt Regency" mehmanxanasında dövlət qulluğu
müşaviri, hüquq elmləri namizədi Rəşad
Əzizovun "Elektron hüquqa giriş" (rus dilində)
kitabının təqdimatı olmuşdur. Hüquq və
informasiya texnologiyaları sahələrinin
mütəxəssisləri, dövlət məmurları,
özəl bölmə nümayəndələri,
eləcə də geniş oxucu kütləsi
üçün nəzərdə tutulmuş kitaba "Ön
söz"ü rabitə və informasiya texnologiyaları
naziri, akademik Əli Abbasov yazmışdır.
Tədbirdə rabitə və informasiya texnologiyaları
nazirinin müavini Elmir Vəlizadə, təhsil nazirinin
müavini Elmar Qasımov, Konstitusiya Məhkəməsi
Aparatının rəhbəri Arif Zeynalov, Milli Məclisin
deputatı Əhəd Abıyev, Azərbaycan
Respublikasının Prezidenti yanında Dövlət
İdarəçilik Akademiyasının prorektoru, fəlsəfə
elmləri doktoru, professor Əlikram Abdullayev, Bakı
Dövlət Universitetinin kafedra müdiri, politoloq
Rüstəm Məmmədov və başqaları
çıxış edərək bu kitabı əlamətdar
hadisə kimi qiymətləndirmiş, nəşrdə
"Elektron hökumət" anlayışı ilə
bağlı ciddi araşdırmaların
aparıldığını diqqətə
çatdırmışlar.
Bildirilmişdir ki, informasiya-kommunikasiya texnologiyaları
(İKT) Azərbaycanda neft-qaz sənayesindən sonra ən
dinamik inkişaf tempinə malik sahədir. Bu sahənin
inkişafına Azərbaycanda iqtisadiyyatın
şaxələndirilməsi, ümumi istehsalda qeyri-neft
sektorunun çəkisinin artması, ölkənin
gələcəyinin neft amilindən asılılığının
azaldılması üzrə ümumi inkişaf
konsepsiyasının tərkib hissəsi kimi baxılır. Bu,
Prezident İlham Əliyevin müəyyənləşdirdiyi
siyasətdir və onun reallaşmasına dövlətimizin
başçısı şəxsən səy
göstərir. Qeyd edilmişdir ki, hazırda "Elektron
hökumət" institutu qloballaşan dünyada xüsusi yer
tutur. Bu, ilk növbədə səmərəli
idarəçiliyin həyata keçirilməsində,
korrupsiya ilə mübarizədə, dövlət
vəsaitlərinə qənaət olunmasında, inzibati
münasibətlərin səmərəli həyata
keçirilməsində böyük əhəmiyyətə
malikdir. Hüquqi dövlətdə istənilən ictimai
münasibətlər, xüsusilə də
vətəndaş-dövlət münasibətləri
hüquq elmi tərəfindən tənzimləməni
tələb edir. Rəşad Əzizovun"Elektron hüquqa
giriş" kitabı informasiya hüququ ilə bağlı
ölkəmizdə nəşr edilmiş ilk elmi
əsərlərdən biridir.
Çıxış edənlər belə gənc
tədqiqatçıların elm sahəsinə gəlişini
təqdirəlayiq saymış, həmçinin kitabın
həm Azərbaycan, həm də ingilis dillərinə
tərcümə edilməsinin vacibliyini
vurğulamışlar.
Müəllifin namizədlik dissertasiyasını Rusiyanın
Sankt-Peterburq Dövlət Universitetinin hüquq
fakültəsində müdafiə etdiyi də
bildirilmişdir.
Sonda Rəşad Əzizov Rabitə və İnformasiya
Texnologiyaları Nazirliyi və Elektron İdarəçilik
və İnformasiya Cəmiyyətinin İnkişafı
Mərkəzinin dəstəyi ilə işıq üzü
görmüş kitabın yazılması
zərurətindən danışmış, tədbirin
keçirilməsində əməyi olanlara və
iştirakçılara təşəkkürünü
bildirmişdir.
Azərbaycan.- 2008.- 16 mart.- S. 11.