Mayın 10-da
paytaxt sakinlərinin və qonaqlarımızın sevimli
istirahət yeri olan Heydər Əliyev adına Sarayın
qarşısındakı park möcüzəli gül
bağına çevrilmişdi. Burada ulu öndərimiz, dünya şöhrətli siyasi xadim Heydər Əliyevin 85 illik yubileyi ilə əlaqədar gül bayramı təşkil olunmuşdur.
Ümummilli liderimiz Heydər Əliyevin çoxşaxəli siyasi
fəaliyyətindən danışan
Bakı Şəhər
İcra Hakimiyyətinin
başçısı Hacıbala
Abutalıbov iftixar hissi ilə bildirmişdir ki, qədirbilən xalqımız dahi rəhbərimizin xidmətlərini heç
vaxt unutmayacaqdır. İnsanların Heydər Əliyevə olan sonsuz məhəbbətini
müxtəlif formalarda
nümayiş etdirdiklərini
diqqətə çatdıran
icra hakimiyyəti başçısı qeyd
etmişdir ki, gül bayramında iştirak edən yaradıcı şəxslərin, tələbə və məktəblilərin
dahi rəhbərimizə
həsr etdikləri sənət əsərləri
də xalqımızın
böyük oğluna
olan tükənməz
sevgisinin bariz nümunəsidir.
Bayrama gələnlərin
diqqətini ilk olaraq parkın mərkəzindəki müstəqil
dövlətimizin xilaskarı
və qurucusunun, xalqımızın dahi oğlunun əzəmətli
abidəsi özünə
cəlb edirdi.
Güllərlə bəzədilmiş
abidənin postamentində
milli ornament - buta öz əksini
tapmışdır. Abidənin
ətrafında gözəl
çiçəklərdən “toxunan” xalçada da ümummilli liderin portreti əks olunmuşdur.
Bakı Şəhər İcra Hakimiyyətinin təşkil
etdiyi bayramda qurulan kompozisiyalar, İtaliya, Fransa və Hollandiyadan gətirilmiş gül-çiçəkdən hazırlanmış
rəngarəng tablolar
öz görünüşü
və ifadəliyi ilə diqqəti cəlb edir, gözəlliyin, insan təxəyyülünün hədsiz
imkanlarını nümayiş
etdirir, hər kəsdə xoş ovqat yaradırdı.
Burada ətirli güllərdən hazırlanmış
dövlət rəmzləri,
yazın gəlişinə
həsr olunan rəsm əsərləri,
nadir ağaclar nümayiş etdirilmiş,
bəzək bitkilərindən,
qurudulmuş bitki kollarından istifadə olunmaqla yaradılmış
eksponatlardan ibarət sadə və eyni zamanda
orijinal və modern üslubda kompozisiyalar qurulmuşdur. Hər tərəf al-əlvan bahar ətirli güllərə
qərq olmuşdur. Çiçəklərdən hörülmüş zövqoxşayan
mənzərələr insanların
çöhrələrində təbəssüm oyadırdı.
Müxtəlif gül
kompozisiyalarından, pannolardan,
şəkil və plakatlardan, əl işlərindən ibarət
sərgilər gül
bayramına gələnləri
dönə-dönə
ayaq saxlamağa vadar edirdi. Gül bayramı
ümummilli liderimiz Heydər Əliyevin 85 illiyinə həsr olunduğu üçün
nümayiş etdirilən
hər bir gül çələngində,
əl işlərinin
mövzu və kompozisiyasında sevimli rəhbərə məhəbbət,
onun xatirəsinə ehtiram və səmimiyyət hissləri
qabarıq gözə
çarpırdı.
Öz nəvələri
ilə bu möhtəşəm gül
bayramına gələn
Nərgiz nənə də təəssüratını
belə bölüşmüşdür:
“Gül bayramı ölkəmizi gülüstana
çevirən ümummilli
liderimiz, ulu öndər Heydər Əliyevin əziz xatirəsinə xalqın kiçik hədiyyəsidir.
Gül baharın gəlişi, gözəllik
rəmzidir. Gül bayramı bütün dünyaya sülh, azadlıq, ədalət gətirmək, insanlar arasında sevgi, dostluq münasibətləri
yaratmaq üçün
əla vasitədir. Qoy, doğma Azərbaycan həmişə
çiçəklənsin!”
Səhər saat 8-dən
başlanan gül bayramına gələnlər,
mahir sənətkarların
canlı ifalarının
sədaları altında
dünyanın 150-dən
çox ölkəsindən
gətirilən dibçəkdə
əkilən, ən nadir güllərlə də tanış olmaq imkanı qazanmışlar.
Bayramda ölkəmizdə
fəaliyyət göstərən
diplomatik korpusun nümayəndələri, tanınmış
ziyalılar, respublikamızın
müxtəlif rayon və şəhərlərindən
Bakıya gəlmiş
insanlar, Azərbaycan paytaxtının qonaqları
iştirak etmişlər.
Xalq qəzeti.- 2008.- 11 may.- S. 4.