Günay

Milli Kitabxanada kitab sərgisi keçirilib

Dünən M.F.Axundov adına Milli Kitabxanada Mədəniyyət və Turizm Nazirliyinin təşkilatçılığı ilə ümummilli lider Heydər Əliyevin anadan olmasının 85 illiyinə həsr olunmuş "Heydər Əliyev müstəqil Azərbaycanın memarıdır" adlı kitab sərgisi nümayiş etdirildi.

Eyni zamanda Viktor Andriyanov və həmyerlimiz yazıçı Milli Məclisin deputatı Hüseynbala Mirələmovun "Görkəmli şəxslərin həyatı" seriyasından "Moldova qvardiya" nəşriyyatında çap olunmuş "Heydər Əliyev" kitabının Azərbaycan dilində nəşri və onun Milli Kitabxana tərəfindən hazırlanmış elektron versiyası təqdim edildi.

Tədbiri giriş sözü ilə açan Milli Kitabxananın direktoru Kərim Tahirov bildirdi ki, Heydər Əliyev M.F.Axundov adına kitabxananı çox sevirdi, o bura dəfələrlə gəlmişdir. İlk dəfə onun kitabxanaya gəlişi kitabxanaya bir yenilik, bir dirçəliş, bir uğur gətirmişdi. Hətta ulu öndər kitabxananın fondunun zənginləşməsi üçün həmişə yeni bir qərar imzalayırdı və göstərişlər verirdi. Hətta ulu öndərin özünün şəxsi kitabxanasında bizə hədiyyə etdiyi qiymətli kitablar bu sərgidə yer alıb."

Sərgidə H.Əliyevin öz şəxsi kitabxanasından hədiyyə etdiyi və şəxsi imzası olan kitablar ayrıca bir stenddə nümayiş olunurdu. Sərgi ilə tanışlıqdan sonra Viktor Andiryanov və Hüseynbala Mirələmovun "Görkəmli şəxslərin həyatı " seriyasından "Heydər Əliyev" kitabı və onu elektron versiyası iştirakçılara təqdim edildi.

Sərgidə çıxış edən Mədəniyyət və Turizm naziri Əbülfəs Qarayev onu da nəzərə çatdırdı ki, H.Əliyevin 85 illiyi ilə bağlı olaraq bu yaxınlarda "Heydər Əliyev və Azərbaycan mədəniyyəti" üçcildliyi, biblioqrafik toplu və onların elektron variantı ictimaiyyətə təqdim ediləcək.

Paritet.- 2008.- 6-7 may.- S. 11.