Beynəlxalq Film Festivalı başa çatmışdır

AzərTAc xəbər verir ki, mayın 10-da Beynəlxalq Ticarət Mərkəzində Yeni Azərbaycan Partiyasının (YAP) və ANS şirkətlər qrupunun birgə təşkilatçılığı ilə ulu öndərimiz Heydər Əliyevin anadan olmasının 85 illiyinə həsr edilmiş Beynəlxalq Film Festivalının qaliblərinin mükafatlandırılması mərasimi keçirilmişdir.
Milli Məclis deputatlarının, YAP icra aparatı nümayəndələrinin, ictimai-siyasi xadimlərin iştirak etdikləri tədbirdə münsiflər heyətinin üzvü Mailə Muradxanlı çıxış edərək tədbirin əhəmiyyətindən danışmışdır.
Qeyd edilmişdir ki, hazırda həm ölkəmizdə, həm də onun hüdudlarından kənarda ulu öndər Heydər Əliyevin yubileyi ümumxalq bayramı səviyyəsində təntənəli şəkildə qeyd olunur. Bu festival da həmin tədbirlərin bir parçasıdır. Bildirilmişdir ki, Azərbaycanda ilk dəfə keçirilmiş bu tədbirdə müxtəlif dövrlərdə ulu öndər Heydər Əliyev haqqında hazırlanmış filmlər göstərilmişdir. Aprelin əvvəlindən elan olunmuş müsabiqəyə 50-yə yaxın sənədli və televiziya filmi təqdim edilmişdir. Onların arasından 17 film festivalda nümayiş etdirilmək hüququ qazanmışdır. Mayın 7-də yekun vurulmuş festivalda münsiflər heyəti tərəfindən 6 nominasiya üzrə filmlər seçilmişdir.
YAP icra katibinin müavini, Milli Məclisin deputatı Mübariz Qurbanlı görkəmli dövlət xadimi, müasir Azərbaycan dövlətinin qurucusu Heydər Əliyevin tarixi xidmətlərindən, müstəqil dövlətimizin ulu öndər tərəfindən müəyyən edilmiş prinsiplərindən söz açmışdır. Bildirmişdir ki, ümummilli liderin müəyyən etdiyi siyasi kurs bu gün Prezident İlham Əliyev tərəfindən uğurla davam etdirilir, Azərbaycanın beynəlxalq nüfuzu durmadan artır.
Beynəlxalq Film Festivalının Heydər Əliyev irsinin öyrənilməsi baxımından əhəmiyyətini vurğulayan M.Qurbanlı qalibləri təbrik etmiş, onlara yaradıcılıq uğurları arzulamışdır.
Münsiflər heyəti tərəfindən müəyyən edilmiş qaliblərə - "Bir gülüşün tarixçəsi" (rejissor Nazim Əhmədov), "Yaddaş" (rejissor Vahid Mustafayev), "Mədəniyyətimizin hamisi" (rejissor İqbal Məmmədəliyev), "Heydər Əliyevə həsr olunmuş kliplər" (rejissor Mehparə Nəcəfova), "Vətənin keşiyində" (rejissor Eldar Quliyev) və "Ali sevgi" (rejissor Akif Arifoğlu) filmlərinə xüsusi mükafatlar təqdim edilmişdir

Azərbaycan.- 2008.- 11 may.- S. 4.