Mükərrəmoğlu M.

Uşaq muğam ifaçılarının IV Respublika müsabiqəsi

Azərbaycan Respublikasının Mədəniyyət və Turizm Nazirliyi xalqımızın mədəni sərvətlərini qoruyub saxlamaq, inkişaf etdirmək, milli musiqimizə, xalq mahnıları və təsniflərə, muğam sənətinə marağı artırmaq və yeni gənc istedadlı muğam ifaçılarını aşkara çıxarmaq məqsədilə 2008-ci ilin aprel-may aylarında Uşaq muğam ifaçılarının IV respublika müsabiqəsini keçirir. Bununla əlaqədar 2008-ci il aprel ayının 1-dən respublikanın şəhər və rayonlarında müsabiqənin I turu keçirilmişdir. İlk turun nəticələrinə görə, respublikanın 56 şəhər və rayonundan 152 nəfər gənc ifaçı may ayının 14-dən 18-dək Astara rayonunda keçiriləcək yekun turda iştirak etmək üçün vəsiqə qazanmışdır.
Müsabiqənin münsiflər heyətinə görkəmli muğam ustaları - respublikanın xalq artistləri Canəli Əkbərov, Ağaxan Abdullayev, Səkinə İsmayılova, Mənsum İbrahimov, Azərbaycan Dövlət Xalq Çalğı Alətləri Orkestrinin bədii rəhbəri və dirijoru, əməkdar incəsənət xadimi Ağaverdi Paşayev, əməkdar artist Gülyaz Məmmədova və Mədəniyyət və Turizm Nazirliyi Aparatının regionlarla iş sektorunun aparıcı məsləhətçisi Oqtay Muxtarov daxildirlər.
Beş gün davam edəcək müsabiqəyə mayın 18-də yekun vurulacaq. Qaliblərin təltifolunma mərasimi və onların iştirakı ilə konsertin Bakı şəhərində R.Behbudov adına Mahnı Teatrında keçirilməsi nəzərdə tutulmuşdur.

Xalq qəzeti.- 2008.- 16 may.- S. 9.