Xalq Cümhuriyyətinin 90 illik yubileyi qeyd edilmişdir

Mayın 23-də Beynəlxalq Mətbuat Mərkəzində qeyri-hökumət təşkilatları - Dünya Azərbaycanlıları Mədəniyyət Mərkəzi və Sabitlik və İnkişaf Mərkəzi (SİM) Azərbaycan Xalq Cümhuriyyətinin 90-cı ildönümünə həsr olunmuş birgə tədbir keçirmişlər.
Tədbirdə Dünya Azərbaycanlıları Mədəniyyət Mərkəzinin rəhbəri, xalq şairi Söhrab Tahir, SİM-in sədri Rasim Məmmədov və Azərbaycan Ali İctimai-Siyasi Universitetinin rektoru Rasim Nəbiyev çıxış edərək cəmi 23 ay yaşamış Xalq Cümhuriyyətinin şərəfli tarixindən danışmış, onun varisi, bu gün inamla addımlayan müstəqil respublikamızın beynəlxalq miqyasda özünəməxsus layiqli yer tutmasında xalqımızın müdrik oğlu, yeni müstəqil Azərbaycan dövlətinin banisi və qurucusu, dünya şöhrətli siyasi xadim, ümummilli liderimiz Heydər Əliyevin misilsiz xidmətlərini xüsusi vurğulamışlar. Onlar 1918-ci il mayın 28-də Şərqdə ilk demokratik respublikanın yaradıldığını qeyd etmiş, bu dövlətin Azərbaycan dilinin dövlət dili elan edilməsi, milli ordunun yaradılması sahəsində gördüyü işləri yüksək qiymətləndirmişlər.
Natiqlər müstəqilliyimizin bərpasından sonra dövlətçiliyimizin qurulmasında və inkişafında, onun beynəlxalq aləmdə tanınmasında ümummilli liderimiz Heydər Əliyevin misilsiz xidmətlərini, dahi rəhbərimizin siyasi xəttinin Prezident İlham Əliyev tərəfindən əzmlə həyata keçirildiyini vurğulamışlar.
Sonda hər iki qurum arasında iş birliyi ilə əlaqədar bəyanat qəbul olunmuşdur.
Bəyanatda qeyd edilmişdir ki, hər iki qeyri-hökumət təşkilatının iş birliyi onların təsdiq olunmuş fəaliyyət proqramlarının uyğun cəhətləri əsasında yaradılır.

Azərbaycan.- 2008.- 25 may.- S. 5.