Dirijor Yalçın
Adıgözəlovla görüş keçirilib
Dövlət
Musiqi Mədəniyyəti Muzeyinin nəzdində
fəaliyyət göstərən Klassik Musiqi
Həvəskarları Klubunun təşəbbüsü
ilə maestro Niyazinin ev-muzeyində əməkdar
incəsənət xadimi, Bakı Musiqi Akademiyasının
professoru Yalçın Adıgözəlovla görüş
keçirilib.
Yalçın
Adıgözəlov Niyazini xatırlayaraq, maestro ilə
təmasda olmaq, müdrik məsləhətlərini
dinləmək üçün ötən əsrin 60-70-ci
illərində bu mənzilə gənc bəstəkar,
müğənni və ifaçıların
toplaşdıqlarından söhbət açaraq deyib ki,
əslində, həmin vaxt bu mənzildə Azərbaycan
mədəniyyət xadimlərinin yeni nəsli
formalaşıb. Hələ gənc olmalarına baxmayaraq, özlərini artıq bir bəstəkar kimi təsdiqləmiş Arif Məlikov, Vasif Adıgözəlov, Telman
Hacıyev və başqaları bu mehriban, duz-çörəkli
evin istəkli qonaqları olublar.
Otaqda
qoyulmuş ekranda köhnə fotoşəkillər
nümayiş etdirilib.
Söhbətində doğma musiqimizin dünyada daha geniş təbliği məsələlərinə geniş
yer verən Yalçın Adıgözəlov
bu sahədə təbliğat işinin daha yaxşı təşkili ilə bağlı fikirlərini bölüşüb. Y.Adıgözəlov
dünyanın böyük
dirijorları ilə görüşlərindən danışaraq
bildirib ki, belə insanlarla hətta ən qısa ünsiyyət də adama sonsuz
sevinc hissi bəxş edir.
Görüşdə
dirijor ona ünvanlanan sualları cavablandırıb.
Dövlət
Opera və Balet Teatrının solisti, əməkdar artist
Zemfira İsmayılova Niyazinin "Arzu" romansını,
Vasif Adıgözəlovun "Vaqif" operasından
Natəvanın ariyasını və teatrın solisti,
əməkdar artist Həsən Enami ilə birlikdə
həmin operadan duet ifa edib. Görüş
əməkdar artist Murad Hüseynovun Vasif Adıgözəlovun
prelüdlərini fortepianoda
səsləndirməsilə başa çatıb.
525-ci qəzet.- 2008.- 8 noyabr.- S. 20.