Tacikistanda Azərbaycan Mədəniyyəti Günləri keçirilir

Tacikistanda Azərbaycan Mədəniyyəti Günləri keçirilir. Mədəniyyət və Turizm Nazirliyindən verilən məlumata görə, mədəniyyət günlərində Azərbaycanı nazir Əbülfəs Qarayevin rəhbərlik etdiyi nümayəndə heyəti təmsil edir. Düşənbəyə səfər edən Azərbaycan nümayəndə heyəti 5 gün müddətində ölkəmizin mədəniyyətini təbliğ edəcəklər. Azərbaycan Mədəniyyəti Günlərinin proqramına Dövlət Xalq Çalğı Alətləri Orkestri və Fikrət Əmirov adına Mahnı və Rəqs Ansamblının ifasında iki böyük möhtəşəm konsert daxildir. Konsert proqramında Azərbaycan bəstəkarlarının əsərləri ilə yanaşı, Azərbaycan xalq musiqisi, təsniflər, muğamlar geniş təmsil olunub. Mədəniyyət proqramlarına sərgi də daxil edilib. Bu milli dekorativ sənət sərgilərdir. Dekorativ sərgi ilə yanaşı, ölkəmizin görməli yerlərinə həsr olunan foto stendlər də nümayiş olunacaq. Həmçinin taciklər üçün hədiyyə olaraq Jalə Yusifovanın ifasında tacik milli rəqsi və tacik mahnıları təqdim ediləcək. Mədəniyyət günləri çərçivəsində rəsmi şəxslər və ziyalılarımızın işgüzar görüşləri də olacaq. Qeyd edək ki, ötən il Azərbaycanda da Tacikistan Mədəniyyət Günləri keçirilib.

Mövqe.- 2008.- 11-12 noyabr.- S. 3.