Emil Stoyçev Azərbaycan Rəssamlar İttifaqının üzvü seçilmişdir

Bakıda dünya şöhrətli bolqar rəssamının sərgisi açılmışdır

Bolqar rəssamı Emil Stoyçevin Azərbaycan Mədəniyyət və Turizm Nazirliyinin təşkilatçılığı ilə noyabrın 13-də Muzey Mərkəzində açılan fərdi sərgisi ölkəmizin mədəni həyatında əlamətdar hadisəyə çevrilmişdir. Sərgi Azərbaycan Prezidenti İlham Əliyev və Bolqarıstan Prezidenti Georgi Pırvanovun himayəsi ilə keçirilir.

Mədəniyyət və Turizm naziri Əbülfəs Qarayev dünyaya təkrarolunmaz əsərlər bəxş edən rəssamın tabloları ilə tanış olmaq imkanına görə Azərbaycan Prezidenti İlham Əliyevə təşəkkürünü bildirmişdir.

Nazir demişdir ki, Stoyçevin əsərləri dünyanın məşhur muzeylərində saxlanılır və həmin muzeylər onun rəsmlərini böyük fəxrlə nümayiş etdirirlər.

Bolqarıstanın vitse-prezidenti Angel Marin bildirmişdir ki, bu sərgi təkcə Azərbaycan üçün deyil, onun ölkəsi üçün də əlamətdar hadisədir. Biz zəngin bolqar mədəniyyətini dost Azərbaycanda nümayiş etdirmək imkanı əldə etmişik. Bu, bütün sahələrdə münasibətlərimizi yaxşılaşdırmağa, bir-birimizi daha yaxşı tanımağa imkan verəcəkdir.

Azərbaycan Rəssamlar İttifaqının sədri, xalq rəssamı Fərhad Xəlilov qurumun kollegiyasının qərarı ilə Emil Stoyçevin İttifaqa üzv qəbul edildiyini bildirmiş və üzvlük vəsiqəsini bolqar rəssamına təqdim etmişdir.

Emil Stoyçev indiyədək Fransa və Bolqarıstan rəssamlar ittifaqlarının üzvü olduğunu söyləmiş, yaradıcılığına göstərilən diqqətə görə təşəkkürünü bildirmişdir.

Emil Stoyçev bir çox mükafatların, o cümlədən Polşa byenallesinin, "Usta Vladimir Dimitrov", "Qızıl Ezop" beynəlxalq qran-pri mükafatlarının laureatıdır. Onun dünyanın 15-dən çox ölkəsində fərdi sərgiləri keçirilmişdir, əsərləri Fransa, Almaniya, Hollandiya, ABŞ və digər ölkələrin muzeylərində saxlanılır.

Üç ilham pərisi - xanımı Dafinka, qızı Evelina, nəvəsi Yana rəssamla birlikdə Azərbaycana gəlmişlər. Stoyçev kimi, onlar da ilk baxışdan Bakını sevmişlər. Doğmaları deyirlər ki, Emil Stoyçev kimi geniş qəlbli və çox istedadlı insanla həyatda yanaşı addımlamaq böyük xoşbəxtlikdir.

Rusiya Rəssamlar İttifaqının vitse-prezidenti Tahir Salahov AzərTAc-ın müxbirinə demişdir: "Emil Stoyçev həyatsevər insandır. Bu, onun rəsmlərində də əksini tapır. Onun öz yaradıcılıq üslubu, öz dünyası var. Rəssamın hər bir əsərini qəlbən hiss etmək lazımdır".

Stoyçev özü öz üslubunu "fantastik realizm" adlandırır. Onun sulu boya ilə çəkdiyi əsərləri sanki sonsuz xəyaldır.

Sərginin açılışında respublikamızın tanınmış rəssamları, ictimaiyyətin nümayəndələri iştirak etmişlər.

Respublika.- 2008.- 14 noyabr.- S. 6.