“Mən dərdli komedioqrafam”

Ramiz Əzizbəyli: “Yaxşı aktyorun arxasında gizlənən rejissor deyiləm”

Xalq artisti Ramiz Əzizbəylini təqdim etməyə ehtiyac yoxdur. Onun adı da siması kimi Azərbaycanda çox məşhurdur və onun istedadına hər birimiz bələdik: həm bir çox filmlərdə özünü müğənni kimi sınayıb, həm də saysız-hesabsız obrazlar yaradıb. Eyni zamanda, özünü rejissor kimi sınayan xalq artisti sayca az da olsa bir neçə filmə ekran həyatı verib. Kifayət qədər uğurlu hesab olunan filmlər sırasında elə "Bəxt üzüyü"nün adını xüsusi qeyd etmək olar. Bu gün də tamaşaçılar tərəfindən maraqla izlənilən film öz aktuallığını hələ də qoruyub saxlayır.

Rejissorluq fəaliyyətindən bəhs edən Ramiz Əzizbəyli özündən razı qaldığını bizə etiraf etdi: "Çəkdiyim filmlərin sayı az da olsa, uğurlu olub. Elə ilk filmim olan "Pirverdinin xoruzu"ndan misal gətirim. Bu qısametrajlı bədii film Ukraynada beynəlxalq kinofestivalın baş mükafatını qazanıb. "Bəxt üzüyü"nü və "Yalan"ı da uğurlu film sırasında görürəm. Amma qeyd edim ki, "Bəxt üzüyü"nün hər bir tamaşaçının qəlbində xüsusi yeri var. Neçə illərdir bu film öz reytinqini itirmir. Gündə on dəfə də verilsə, tamaşaçı buna baxıb, hər dəfə filmdən yeni misallar öyrənəcək. Çünki ssenaridə olduqca zənginlik var. Amma Afaq Bəşirqızı "Bəxt üzüyü" filmi barəsində açıqlama verib ki, film ona görə baxımlı alınıb. Məgər o, Nəsibə Zeynalovadan böyük sənətkardır? Hüseyn Seyidzadə "Qayınana" filmini aldıra bilmədi, amma mən səhnə variantından qat-qat üstün "Bəxt üzüyü" filmini çəkdim. Rüstəm İbrahimbəyov deyir ki, mən milli film deyiləndə "Bəxt üzüyü"nü yada salıram. Bu, mənim üçün fəxrdir".

Aktyor qeyd etdi ki, adıçəkilən filmdə rol alan 7 aktyorun heç biri film çəkiləndə o qədər də peşəkar deyildi: "Heç biri o vaxta qədər yetərincə tanınmırdı. Amma görün nələr danışırlar? Mən yaxşı aktyorun arxasında gizlənən rejissor deyiləm".

Sənətə aktyor kimi gəlsə də, rejissorluq fəaliyyətindən məmnun olan Ramiz Əzizbəylinin sözlərinə görə, rejissor daxilən azad insan olmalıdır. Çünki o, daxilində böyük ideyalar daşıyır: "Amma təəssüflənirəm ki, bizdə müəyyən məhdudiyyətlərə görə rejissorun azadlığı yoxdur. Dünyanın məşhur filmlərinə baxsaq, görərik ki, onların ssenari müəllifləri də rejissorun özüdür. Rejissor filmin müəllifidir. Yerdə qalanların hamısı oyunçudur. Rejissor cəmiyyətin qəbul edə biləcəyi materialı çəkməlidir. Rejissorumuz da var, ssenarimiz də, digər tərəfdən isə nə rejissorumuz var, nə ssenaristimiz..

Ramiz Əzizbəyli sonuncu dəfə çəkdiyi "Yalan" filmindən sonra bir çox müəllifin ona müraciət etdiyini söylədi: "Həmin müəlliflərin fikrincə, onların əsərini ancaq mən ekrana gətirə bilərəm. Amma hələlik Azərbaycanda o dərəcədə nüfuz sahibi deyiləm ki, hər il gedib deyim, mən bunu çəkmək istəyirəm. Mənə də desinlər ki, get çək. Bir də ki, mənim illərim gedir. Kim bilir, neçə il yaşayacam. Ortaya məhsul çıxarmaq istəyirəm. Mənim içimdə Azərbaycan həqiqətləri barədə dərdlər var. Tutalım, heç dərd yoxdur, amma o qədər komediyalar var. Mən əslində komedioqrafam. Amma mən dərdli komedioqrafam.

Gənclərin kinoya gəlməsini yüksək qiymətləndirən sənətkar keçirilən layihələri çox bəyənir. Lakin o, həmin filmlərə baxmadığını söylədi və əlavə etdi ki, bunun da səbəbi həmin tədbirlərə, təqdimatlara dəvət edilməməsidir: "Mən istəyirəm ki, Azərbaycan kinosu yüksək səviyyədə olsun. Ən nüfuzlu kinofestivalların şərtləri ilə maraqlanmaq, beynəlxalq layihələrə qoşulmaq lazımdır. Mən komediya janrında işləməyi sevən adamam və bu mənim böyük dərd adamı olduğumun göstəricisidir.

60 ilin komediyasını yaratmaq asan deyil. Yəni bu illəri çoxları yaşayır, amma izini dünyada qoyub gedə bilmir. Əslində mən mübarizə aparan adam deyiləm. Hər şey öz yoluna qoyulacaq

Üç nöqtə.- 2008.- 9 oktyabr.- S. 13.