Mədəniyyət və Turizm Nazirliyinin kollegiya iclası keçirilmişdir

AzərTAc xəbər verir ki, oktyabrın 10-da Muzey Mərkəzində Mədəniyyət və Turizm Nazirliyinin kollegiya iclası keçirilmişdir. İclasda son 5 ildə görülən işlər və qarşıda duran vəzifələr müzakirə olunaraq tədbirlər planı təsdiq edilmişdir.

Ölkəmizdə kinematoqrafiya ilə bağlı həyata keçirilən tədbirlər barədə danışılarkən bildirilmişdir ki, Azərbaycan kino sənəti bir əsrdən artıq dövr ərzində əlamətdar hadisələrlə zəngin olmuş, özünəməxsus inkişaf yolu keçmiş, xalqımızın mədəni-mənəvi həyatında mühüm rol oynamışdır. 1991-ci ildən etibarən ölkəmizin vahid kino sistemi dağılmağa başlamış və Azərbaycan kinematoqrafiyası bir sıra çətinliklərlə üzləşmişdir. Keçid mərhələsində ciddi problemlərə baxmayaraq, müstəqillik dövründə Azərbaycan kinosu qısa vaxt ərzində müəyyən uğurlar əldə etmişdir. Dövlətin mədəniyyətimizə, onun bir qolu olan kinematoqrafiyaya qayğısı bu işdə əhəmiyyətli dönüş yaratmışdır. Dövlət Film Fondunun yeni binasının tikintisi ilin sonunadək başa çatdırılacaqdır. C.Cabbarlı adına "Azərbaycanfilm" kinostudiyası əsaslı təmir edilir, "Nizami" kinoteatrında təmir işlərinə başlanacaqdır və sair. Bu sahədə aparılan islahatlar, kadr siyasətinin həyata keçirilməsi kino sənətində yeni, müasir fikrin fomalaşmasına kömək etmişdir. Beynəlxalq aləmdə Azərbaycan kinosu nümunələrinə maraq artmaqdadır.

Vurğulanmışdır ki, bununla arxayınlaşmaq olmaz, Azərbaycan kinosunun dünya standartlarına çatdırılması üçün hələ çox iş görülməlidir.

İclasda beynəlxalq müqavilələrin bağlanılması və nazirliyin tabeliyindəki kütləvi informasiya vasitələrinin fəaliyyəti barədə də danışılmışdır.

Azərbaycan.- 2008.- 11 oktyabr.- S. 6.