M.Adıgözəlzadə: "Biz həmişə ondan nümunə götürürdük"

Azərbaycanın xalq artisti, SSRİ xalq artisti Müslüm Maqomayevin ecazkar səsini dinləyənlərin onu dəfələrlə alqışladığı Azərbaycan Dövlət Filarmoniyası onunla son görüşə hazırlaşır. Ölkəmiz burada, Müslüm Maqomayevin məşhur babasının adını daşıyan filarmoniyanın zalında öz böyük oğlu ilə vidalaşacaqdır. Zəmanəmizin görkəmli müğənnisi ilə vida mərasimindən bir gün əvvəl AzərTAc-ın müxbiri filarmoniyanın direktoru, respublikanın əməkdar artisti Murad Adıgözəlzadə ilə söhbət etmişdir.

M.Adıgözəlzadə demişdir: "Azərbaycan, bütün musiqi aləmi tarixi şəxsiyyəti itirmişdir. Belə bir oğul yetirmiş xalq, böyük və ya kiçikliyindən asılı olmayaraq xoşbəxtdir. Müslüm Maqomayev ilə mənim ilk görüşüm Mstislav Rostropoviçin uzun fasilədən sonra Bakıya gəlişi zamanı olmuşdur. Müslüm Maqomayev onunla birgə gəlmişdi və biz Bakı Musiqi Akademiyasında görüşdük. Müslüm Maqomayev vaxtilə indiki Akademiyanın binasında yerləşən, indi Bülbülün adını daşıyan musiqi məktəbində oxuduğu dövrü qısaca xatırladı. Sonra Azərbaycanın Moskvadakı səfirliyində bir neçə dəfə görüşdük. Səfirlik hər il mayın 10-da Azərbaycan xalqının ümummilli lideri Heydər Əliyevin ad gününə və Böyük Vətən müharibəsində Qələbə gününün ildönümünə həsr edilmiş tədbirlər keçirirdi. Mən Müslüm Maqomayev ilə bərabər həmin tədbirlərdə fəal iştirak edirdim".

Murad Adıgözəlzadə demişdir: "Biz həmişə Müslüm Maqomayevlə fəxr edirdik və ondan nümunə götürməyə çalışırdıq".

Respublika.- 2008.- 29 oktyabr.- S. 6.