Əliyev A.
Əvvəlki illərdən
fərqli olaraq ölkəmizə turist axını çoxalmış,
respublikamızın görməli
yerlərinin tanınması
baxımından da xeyirli olmuşdur. Ölkəmizin yeraltı-yerüstü, gözəl
quruluşa malik su sərvətləri və iqlim şəraiti
turizmin əsas şərtlərindəndir ki,
bu baxımdan da respublikamız öz zənginliyi ilə daha cəlbedicidir.
Son illər
turizmin inkişaf etdiyi rayonlardan biri də Masallıdır.
Ölkə başçısının
imzaladığı "Azərbaycan
Respublikası regionlarının,
o cümlədən, Lənkəran şəhəri,
Astara, Lerik, Masallı və Yardımlı rayonlarının
sosial-iqtisadi inkişafının
sürətləndirilməsinə dair Tədbirlər planı" Masallıda da bəhrəsini
verməkdədir. Belə
ki, burada aparılan işlərin əsas hissələrindən
biri də turizmin inkişafına yol açan sanatoriyaların yaradılması
və oraya turistlərin cəlb edilməsidir.
Masallıda istirahət yerləri çoxdur. Onlardan biri də
öz şöhrəti
ilə nəinki respublikamızda, onun sərhədlərinin hüdudlarından
kənarda da tanınan İstisu sanatoriyasıdır. Talış
dağlarının qoynunda,
dəniz səviyyəsindən
1650 metr yüksəklikdə,
Viləş çayının
sahilində yerləşən
bu sanatoriya hələ qədim zamanlarda da şəfa
ocağı olmuş,
buraya gəlib-gedənlərin sayı heç vaxt azalmamışdır. Buradan
çıxan suyun tərkibində hidrogen-sulfit,
natri-xlor, maqnezili hidrokarbanat və həmçinin yod var. Yerin dərin
qatlarından çıxan
suyun hərarəti 60
dərəcədən yüksək
olur. İsti su ilə müxtəlif
xəstəlikləri müalicə
etmək olur. Xatırladaq ki, bu şəfa ocağı hələ
1971-ci ildə sanatoriya
statusu alıb.
İstisu
sanatoriyası 1998-ci ildə iş adamı İldırım
Allahyarov tərəfindən özəlləşdirilmiş
və həmin andan "Fatimeyi-Zəhra" şəfa
sanatoriyası adlandırılır. Sanatoriyada Avropa standartlarına uyğun müalicə vannaları, istirahət etmək üçün xüsusi kotteclər, 160 yerlik sanatoriya, geniş park və başqa infrastrukturlar mövcuddur. Buraya gələnlərə
qonşu Yardımlı,
Lənkəran, Lerik və Astara rayonlarına turist səfərləri də təşkil edilir. Sanatoriyada verilən yeməklər yüksək
keyfiyyətlidir. Burada
müalicələr xüsusi
həkim nəzarəti
altında aparılır.
Gözəl təbiəti
ilə insanı valeh edən mənzərələrə baxmaqdan
isə doymaq olmur. Sıx meşələr, sərin
bulaqlar, şəlalələr
buraya gələnlərin
könlünü oxşayır.
Əbəs yerə deyil ki, bu
gözəlliyi görənlər
hər yay burada dincəlməyə üstünlük verirlər.
Azərbaycan.- 2008.- 7 sentyabr.-
S. 6.