Milli Azərbaycan Tarixi Muzeyinin eksponatları qonaqlarda böyük maraq doğurmuşdur

OANA İcraiyyə Komitəsinin "Qloballaşan dünyada informasiya hamı üçün" mövzusunda 30-cu iclasının iştirakçıları sentyabrın 3-də Milli Azərbaycan Tarixi Muzeyində olmuşlar.

Qonaqlara məlumat verilmişdir ki, 1920-ci ildə yaradılmış muzeydə qədim dövrdən başlayaraq Azərbaycan tarixinin bütün mərhələlərinə dair 300 mindən çox eksponat toplanmışdır. 1895-1897-ci illərdə tikilmiş və Bakının memarlıq incilərindən sayılan bu bina vaxtilə Azərbaycan milyonçusu, məşhur xeyriyyəçi Hacı Zeynalabdin Tağıyevin mülkü olmuşdur.

Azərbaycanın ərazisində mövcud olmuş Atropatena, Albaniya, Şirvanşahlar, Ağqoyunlular, Səfəvilər dövlətləri dövrünə aid maddi mədəniyyət nümunələri, qədim məişət əşyaları qonaqlarda xüsusi maraq doğurmuşdur. Onlar xalqımızın bir çox görkəmli şəxsiyyətlərinin Avropa tipli təhsil almasına yardımçı olmuş Hacı Zeynalabdin Tağıyevin həyat və fəaliyyətinə dair fotoşəkillərə, tarixi sənədlərə, ona məxsus qiymətli əşyalara da baxmışlar.

Bildirilmişdir ki, 130-dan çox işçinin çalışdığı muzey həm də Milli Elmlər Akademiyasının strukturunda elmi tədqiqat və mədəni-maarif müəssisəsi funksiyasını yerinə yetirir. Muzeyin binası Azərbaycan Prezidenti İlham Əliyevin göstərişi ilə əsaslı təmir olunmuş və yeni görkəm almışdır.

Qonaqlar muzeydən xoş təəssüratla ayrılmışlar.

Azərbaycan.- 2008.- 10 sentyabr.- S. 6.