Təranə

 

70 yaşın uğuru

 

Zaur Məhərrəmov ömrünün 50 ildən çoxunu kinoya həsr edib

 

Bu gün Əməkdar incəsənət xadimi, Dövlət mükafatı laureatı, professor Zaur Məhərrəmovun 70 yaşı tamam olur. Bir sıra bədii və sənədli filmlərin reyissoru, ssenaristi və operatoru kimi tanınan Zaur Məhərrəmov ömrünün 50 ildən çoxunu kinoya həsr edib. Onun həm bədii, həm də sənədli kino sahələrindəki yaradıcılığı milli kinomuzun ən parlaq səhifələrindən birini təşkil edir. Tamaşaçıların sevə-sevə baxdıqları "Uşaqlığın son gecəsi", "Dərviş Parisi partladır", "Ad günü", "Uzun ömrün akkordları" və s. bədii filmlərin quruluşçu operatoru olan Zaur Məhərrəmov Azərbaycan kinosunda öz dəsti-xətti, yüksək poetik obrazlılığı ilə seçilən, böyük peşəkarlıq nümunəsi olan və kinematoqrafın bütün proseslərində aktiv iştirak edən bir sənətçi kimi tanınır.

Fəaliyyətinə 1956-cı ildə "Azərbaycanfilm" kinostudiyasında operator assistenti kimi başlayan Z.Məhərrəmov bir il sonra Moskvanın Kinematoqrafiya İnstitutunun operatorluq fakultəsinə qəbul olunub. İnstitutu müvəffəqiyyətlə bitirdikdən sonra - 1963-cü ildə "Azərbaycanfilm" kinostudiyasında fəaliyyətini davam etdirib.

Professional Kinoreyissorlar Gildiyasının Bürosunun məlumatında bildirilir ki, o, Xan Babayev, Şamil Mahmudbəyov, Arif Babayev, Rasim Ocaqov, Tofiq Tağızadə kimi Azərbaycan kinosunun korifeyləri ilə birgə çalışaraq 16 tammetraylı bədii filmin yaradılmasında quruluşçu operator kimi iştirak edib və bu əsərlərlə kinomuzun operator məktəbini daha da yüksək zirvələrə qaldırıb.

Z.Məhərrəmov 1980-ci illərin əvvəlindən reyissor və ssenarist kimi fəaliyyətini davam etdirərək, öz yaradıcılığını sənədli filmlər kinosuna həsr edib. O, 1984-cü ildə "Yaddaş" studiyasını yaradaraq, həmin studiyada ölkəmizə böyük uğurlar gətirən "Bakı balkonları", "Köç", "Almas İldırım", "Üzeyir Hacıbəyov" "Həbib və Gülxanım", "Meydan" və s. filmlərini yaradıb.

Z.Məhərrəmovun müəllifi olduğu filmlər bir çox Beynəlxalq festivallarda iştirak edərək mükafatlara layiq görülüb. "Həbib və Gülxanım" filmi IX Nyu-York Türk filmləri fesivalında uğurla nümayiş etdirilib.

Z.Məhərrəmov bu gün Tükiyənin Anadolu Universitəsinin kino və TV bölməsində dərs deyərək, türk xalqının kinosunun inkişafına öz töhfəsini verir. O, həmçinin Türkiyə sinemaçıları ilə Azərbaycan kinematoqrafçıları arasında ünsiyyət yaradılmasında körpü rolunu oynayır.

 

Kaspi.- 2008.- 29 yanvar.- S. 17.