Yanvarın 22-də Heydər
Əliyev Fondunun prezidenti, YUNESKO-nun və İSESKO-nun
xoşməramlı səfiri, Milli Məclisin deputatı
Mehriban Əliyeva "Muğam televiziya
müsabiqəsi-2007"nin qalibləri və münsiflər
heyətinin üzvləri ilə
görüşmüşdür.
Mehriban ƏLİYEVA görüşü açaraq dedi:
- Əziz qonaqlar, mən sizi Heydər Əliyev Fondunda
salamlayıram, xoş gəlmisiniz.
Görüşümüzün əvvəlində mən
böyük kədər hissi ilə qeyd etməliyəm ki,
Azərbaycanın musiqi sənətinə böyük itki
üz vermişdir. Görkəmli incəsənət xadimi,
məşhur müğənni Lütfiyar İmanov
dünyasını dəyişmişdir. Mən əminəm
ki, onun yaradıcılığı, onun səsi,
mədəniyyətimizdə qoyduğu iz insan
ömründən çox-çox uzun yaşayacaqdır.
Allah rəhmət eləsin.
Əziz dostlar, mən sizi görməyə çox şadam.
Bu gün biz birlikdə "Muğam televiziya
müsabiqəsi-2007"nin uğurlu nəticələrini
müzakirə edəcəyik. Siz bilirsiniz ki, bu layihə
Heydər Əliyev Fondunun və Azərbaycan
Mədəniyyətinin Dostları Fondunun dəstəyi ilə
həyata keçirilmişdir. Biz bu layihəni başlayanda
əsas məqsədlərimiz qədim Azərbaycan
muğamını təbliğ etmək, zəngin muğam
məktəbi üçün yeni səslər axtarmaq və
əlbəttə ki, gənc ifaçılar
üçün, onlara potensialını tam şəkildə
reallaşdırmaları üçün şərait yaratmaq
idi. Hesab edirəm ki, qarşıya qoyduğumuz bütün
məqsədlərə biz nail olmuşuq. Muğam
müsabiqəsi çox böyük uğurla başa çatdı
və bir daha muğamın möhtəşəmliyini
hamıya göstərdi. Bir daha sübut etdi ki, muğam
Azərbaycanda ən sevilən, ən dəyərli musiqi
janrlarından biridir. Mən bu üç ay ərzində
həm Azərbaycandan, həm də xaricdən
çoxsaylı məktublar alıram. Bu məktubları
göndərən insanlar muğama olan sevgilərindən,
hörmətindən yazırlar və bizim bu müsabiqəni
dəstəklədiklərini bildirirlər. Demək olar ki,
artıq bu muğam müsabiqəsi xalq arasında çox
böyük populyarlıq qazanmışdır və mən
hesab edirəm ki, yəqin ki, ənənəvi xarakter
daşımalıdır. Muğam müsabiqəsinin
bütün iştirakçılarını, xüsusilə
laureatları, sizi bu parlaq qələbə
münasibətilə ürəkdən təbrik edirəm.
Mən bilirəm ki, üç ay ərzində siz çox
böyük narahatlıq hissləri keçirmisiniz.
Çünki müsabiqə çox ciddi rəqabət
şəraitində keçirdi. Bütün
iştirakçılar gözəl səsə malik idi və
gözəl ifa qabiliyyəti nümayiş etdirdilər.
Əlbəttə, belə bir yolun sonunda qalib gəlmək
çox şərəflidir.
Mən bir daha sizi təbrik edirəm və
gələcəkdə uğurlar arzulayıram. Onu da qeyd
etmək istərdim ki, bu müsabiqə ərzində siz
öz səslərinizlə, qabiliyyətinizlə xalq
məhəbbətini qazanmısınız. Bu, ən vacib
amildir və inanıram ki, gələcəkdə bu məhəbbət
daha da artacaqdır. Sizin bacarığınız daha da
artacaqdır. Ona görə də sizi bir daha
ürəkdən təbrik edirəm, yeniyeni uğurlar arzu
edirəm.
Mən bu gün münsiflər heyətinin
üzvlərinə öz dərin
minnətdarlığımı çatdırmaq
istəyirəm. Bilirəm ki, bu müsabiqənin
hazırlıq mərhələsində siz nə qədər
ağır iş görmüsünüz. Ölkəmizin
müxtəlif regionlarında olmusunuz,
iştirakçıları seçmisiniz, onların
ifalarını obyektiv və peşəkarlıqla
qiymətləndirmisiniz. Münsiflər heyətində bizim
hörmətli muğam ustadlarımızın iştirakı
bütün bu müsabiqəni, demək olar ki, açıq
bir muğam dərsinə çeviribdir. Hər bir adam buna
ustadlarla gənclərin ünsiyyət qurmaq dərsi kimi
baxırdı, bu cür qiymətləndirirdi.
Muğam bizim mədəniyyətimizin, Azərbaycan
mədəniyyətinin əsas sütunlarından biridir və
əlbəttə, onu qorumaq, inkişaf etdirmək,
gələcək nəsillərə çatdırmaq hər
bir azərbaycanlının mənəvi borcudur. Mən bu
gün fürsətdən istifadə edərək bizim
ünlü sənətkarlarımıza, muğam
ustadlarına muğamın inkişafı, təbliği
sahəsində səylərinə görə öz dərin
minnətdarlığımı bildirmək istəyirəm.
Çox sağ olun!
Siz bilirsiniz ki, Heydər Əliyev Fondu olaraq biz,
həmçinin Azərbaycan Mədəniyyətinin
Dostları Fondu bu istiqamətdə bir çox layihələr
həyat keçiririk. "Qarabağ xanəndələri"
musiqi albomu buraxılıb, "Muğam" jurnalı
nəşr olunur, "Muğam" ensiklopediyasının
həm çap, həm də elektron versiyası
hazırlanır. Ən əsası isə hamımızın
təməlqoyma mərasimində bərabər iştirak
etdiyimiz Muğam Mərkəzi tikilir. Mən inanıram ki, bu
ilin avqust ayında birlikdə onun
açılışında iştirak edəcəyik. Bu,
çox böyük nailiyyətdir. Çünki bu, hər
bir muğam ustadı üçün və hər bir
muğamsevər üçün doğma ev olacaqdır. Biz
müsabiqələrimizi Mahnı Teatrında, filarmoniyada
keçirdik, amma mən inanıram ki, gələcəkdə
orada keçirəcəyik. Çünki bu, əslində
muğamın öz doğma evi olacaqdır. Eyni zamanda bu
layihə YUNESKO tərəfindən dəstəklənir
və bu, beynəlxalq mərkəzdir. Biz orada beynəlxalq
tədbirlər də keçirə bilərik və
bütün dünyaya öz muğamımızı tanıtmalıyıq.
Bir sözlə, Azərbaycan mədəniyyətinin ən
dəyərli irsi olan muğam hər bir azərbaycanlı
üçün qiymətlidir, hər bir azərbaycanlı
üçün seviləndir. Mən bir daha bu gün sizə
öz minnətdarlığımı bildirmək
istəyirəm. Çünki siz bu sənətin
qorunmasında çox böyük işlər
görürsünüz.
Çox sağ olun.
* * *
Muğam müsabiqəsinin münsiflər heyətinin
üzvləri - xalq artistləri Əlibaba Məmmədov, Arif
Babayev, Ağaxan Abdullayev, Səkinə İsmayılova,
Mənsum İbrahimov, Azərbaycan Bəstəkarlar
İttifaqının katibi, sənətşünaslıq
doktoru, professor Ramiz Zöhrabov, "Muğam televiziya
müsabiqəsi" layihəsinin icraçısı,
əməkdar incəsənət xadimi Nadir Axundov Azərbaycan
mədəniyyətinə göstərilən qayğıya
görə Mehriban xanıma minnətdarlıq etdilər.
Bildirdilər ki, üç ay ərzində davam edən bu
müsabiqə istedadlı ifaçıları aşkara
çıxarmaqla yanaşı, mədəniyyətimizin
zənginləşməsinə xidmət etmiş, habelə
yeni ifaçılar nəslinin yetişməsinə təkan
vermişdir. Musiqimizin daha da geniş təbliği
üçün gələcəkdə muğamla
bağlı beynəlxalq simpoziumların, festivalların keçirilməsi
arzu olunur.
Mehriban xanım Əliyeva gələcəkdə Azərbaycan
xalq çalğı alətləri
ifaçılarının müsabiqəsinin
keçirilməsi barədə təklifi razılıq hissi
ilə qarşıladı. O, Azərbaycan
mədəniyyətinin zəngin ənənələrini
bütün dünyada təbliğ etməklə qədim
irsimizin bədnam qonşularımız tərəfindən
mənimsənilməsi cəhdlərinin
qarşısının alınmasında istedadlı
gənclərimizin rolunu xüsusi vurğuladı. Bu il Belqradda
keçiriləcək "Avroviziya" mahnı
müsabiqəsində ölkəmizin iştirak
edəcəyini deyən Mehriban xanım Əliyeva Ermənistan
təmsilçisinin bu müsabiqəyə təqdim etdiyi
mahnının Azərbaycan musiqisi parçalarından
ibarət olduğunu xatırlatdı. Bildirdi ki, bu cür
halların qarşısını almaq üçün
Azərbaycanın istedadlı gəncləri bütün
dünyada qədim və zəngin tarixə malik muğamımızı,
xalq mahnılarımızı tanıtmaq, sevdirmək
üçün çalışmalıdırlar.
Azərbaycan.- 2008.- 23 yanvar.- S. 2.