Sevda Ələkbərzadə liderlər sırasında

Müğənninin mahnısı Vaşinqtonda 7-ci olub

Müğənni Sevda Ələkbərzadənin ifa etdiyi "Gül açdı" mahnısı Vaşinqton radiostansiyasının - KAOS-FM-in hit-paradında 7-ci yeri tutub. Müğənninin "Kaspi"yə verdiyi məlumata görə, bu barədə informasiya onun diqqətinə radio təmsilçilərindən çatdırılıb.

Xatırladaq ki, radiostansiya ilə əməkdaşlığını ötən ildən davam etdirən S.Ələkbərzadə bunun genişləndirilməsi istiqamətində çalışdığını söylədi. Müğənni əlavə etdi ki, yaxın günlərdə Avropanın "World Music Magazine" yurnalında müsahibəsi dərc ediləcək: "Fəxrlə qeyd edə bilərəm ki, ilk azərbaycanlı müğənnisi olaraq bu yurnala müsahibə vermişəm".

Söhbət zamanı öyrəndik ki, müğənninin yaxın aylarda Avropa standartlarına uyğun olan növbəti diski işıq üzü görəcək. Yaradıcılıq məhsulu üzərində ciddi çalışdığını deyən S.Ələkbərzadə diskin əvvəlkilərdən bir çox xüsusiyyəti ilə fərqlənəcəyini diqqətə çatdırdı. Klip çəkilişləri barədə isə müğənni hələ düşünmür. O, yaradıcılıq fəaliyyəti üçün bunu bir o qədər də əhəmiyyətli iş hesab etmir.

Kaspi.- 2008.- 30 yanvar.- S. 17.