Quliyeva A.

Mənim “Yeni ulduz”dakı əsas işim pərdə arxasında qalır

Xalq artisti Mübariz Tağıyev: "Yeni ulduz-7"nin iştirakçilarindan Çingiz Mustafayev hər cəhətdən müsabiqənin meyarlarina uyğun gəlir"

Müsahibimiz "Yeni ulduz"müsabiqəsinin münsiflər heyətinin üzvü, xalq artisti Mübariz Tağıyevdir

- Mübariz müəllim, artıq neçə müddətdir ki, ATV kanalında yayımlanan "Yeni ulduz" layihəsində münsif kimi sizi də görürük. Bu layihə haqqında ümumən nə deyərdiniz?

- "Yeni ulduz" estrada müsabiqəsi əslində alman proyektidir və ilk dəfə Almaniyada həyata keçirilib. Sonradan bu proyekt Türkiyədə və başqa Avropa ölkələrində, o cümlədən Azərbaycanda gerçəkləşib. Layihənin şərtlərinə görə, bu proyektə icra olunduğu ölkələrin dəyərlərinə uyğun xırda dəyişikliklər etməyə icazə verilir.

- Necə düşünürsüz, "Yeni ulduz" layihəsi Azərbaycan estradası üçün nə qədər əhəmiyyətlidir?

- Əvvəla, onu qeyd edim ki, Azərbaycan vokal məktəbi istər Milli Konservatoriyanın, istərsə də Mədəniyyət və İncəsənət Universitetinin nəzdində heç vaxt yaranmayıb və bu gün də yoxdur. Azərbaycan pop-estrada musiqisinin təməli ötən əsrin 90-cı illərindən bəri qoyulub. Buna görə də düşünürəm ki, belə şəraitdə estrada-pop musiqisini təbliğ edən müsabiqələrə həqiqətən də ehtiyac var. Amma bu o demək deyil ki, "Yeni ulduz" layihəsində iştirak edən hər ifaçı Azərbaycan estradası üçün əhəmiyyətlidir. Hesab edirəm ki, indiyə qədər "Yeni ulduz"dakı uşaqlardan heç olmasa 10 nəfəri bu gün ciddi şəkildə sənətlə məşğul olursa, bu artıq nə isə deməkdir. Bir məqamı da unutmamalıyıq ki, "Yeni ulduz" səhnə yox, televiziya müsabiqəsidir. Ona görə də bu layihədə şou xatirinə atılan addımlar da istisna deyil. Bir vaxtlar bu müsabiqədə münsiflər heyətində Aygün Kazımovanın da iştirakı belə xarakter daşıyırdı. Amma bu o demək deyil ki, bu müsabiqə qeyri-ciddidir. Yox, əksinə. Bəlkə də kənardan çox asan görünən estrada-pop musiqisi əslində xalq musiqisi və muğam qədər, bəlkə onlardan da çətindir. Çünki xalq musiqisi, muğam bizim qanımızda, canımızdadır, amma estrada musiqisinin Azərbaycanda vüsət alması yeni hadisədir. "Yeni ulduzun" başqa müsabiqələrdən bir fərqi də odur ki, bu proyektdə iştirak edən gənclər müsabiqəyə qatılana qədər səhnədə olmamış və musiqi sahəsində heç bir məktəb keçməmiş gənclərdir. Bu da çox müsbət haldır. Mən Konservatoriyanın və yaxud da hər hansı musiqi məktəbinin tələbələri arasında seçim edilməsinə və onların hansısa müsabiqədə iştirak etməsinə tərəfdar deyiləm. Bu, bir dəfə imtahan vermiş şəxsin ikinci dəfə imtahan edilməsinə bənzəyir. Bir də ki, onsuz da həmin gənclər öz sənətləri ilə məşğul olaraq get-gedə inkişaf edib nə vaxtsa tanına bilərlər. Ona görə də həmişə tərəfdarı olmuşam ki, Azərbaycanın müxtəlif bölgələrindən istedadlı uşaqlar seçilsin və üzə çıxarılsın. Və digər tərəfdən də, əvvəlcədən düzgün olmayan, yanlış bir məktəb keçən gənclərlə işləmək, ona yenidən nəyisə öyrətmək, mənə elə gəlir ki, heç nə bilməyən, sıfırdan başlayan insanla işləməkdən qat-qat çətindir.

- Amma bildiyimiz kimi, bu gün "Yeni ulduz-7"də iştirak edən Aygün Rəhimova əvvəllər də müğənni kimi tanınıb, hətta bir neçə klipi də efirdə nümayiş olunub. Həmin iştirakçının müsabiqədə iştirakı şərtləri pozmur ki?

- Mən deməzdim ki, Aygün Rəhimova müğənni kimi fəaliyyət göstərib, o, sadəcə, özfəaliyyətlə məşğul olub. Bundan başqa, mən efirdə yayımlanan bir-iki səviyyəsiz klipi də klip adlandırmıram və bu hadisəni elə də böyük bir fəlakət hesab etmirəm. Onu da deyim ki, mən bayaq qeyd etdiyim şərtlər "Yeni ulduz" proyektinə uyğun olan şərtlərdir. Amma biz düşündük ki, bu şərtlərə proyektin imkan verdiyi çərçivə daxilində müəyyən qədər dəyişikliklər edək.

- Artıq "Yeni ulduz" 7-ci dəfə keçirilir. Amma bu proyektdə indiyə qədər qalib olmuş gənclər hələ də ortaya ciddi bir iş çıxarmayıblar. Bununla bağlı nə deyərdiz?

- Bilirsiniz ki, televiziya müsabiqəsində qalibləri tamaşaçıların SMS-ləri müəyyən edir və bu hələ o demək deyil ki, yarışmanın qalibi iştirakçıların ən yaxşısıdır. Buna görə də hesab edirəm ki, indiyə qədər keçirilən müsabiqənin qaliblərindən, İlhamə Qasımova istisna olmaqla, heç biri münsiflərin birinciliyə layiq bildiyi iştirakçı deyil.

- "Yeni ulduz" layihəsində siz münsifliklə yanaşı, həm də iştirakçıların hazırlaşmasında onlara müəllimlik də edirsiz. İki vəzifəni yerinə yetirmək çətin deyil ki?

- Düz qeyd etdiniz, çünki mənim bu proyektdə əsas işim, zəhmətim pərdə arxasında qalır ki, bu da olduqca çətin işdir. Bu gün həmin yarışmada iştirak edən gənclər heç bir məktəb görməmiş, əlində mikrofon tutmağı belə bacarmayan gənclərdir və təbii ki, onlar üçün qısa müddət ərzində səhnəyə çıxıb mükəmməl ifa göstərmək çətindir. Təsəvvür etmək çətindir ki, bu uşaqlar məşqsiz səhnəyə çıxıb nəsə ifa etsələr, bu hansı səviyyədə alına bilər.

- Siz həm də münsiflər heyətinin ən mülayim və yumşaq iradlar bildirməsilə seçilən üzvüsünüz. Bu nə ilə bağlıdır?

- Yəqin, bu onunla bağlıdır ki, mən həmin iştirakçılarla məşq etdiyim üçün başqa münsiflərdən daha yaxşı bilirəm, hansı ifaçıdan nəyi tələb etmək olar. Həm də 16-17 yaşlı gənclərin keçirdiyi hiss və həyəcanlar mənə yaxşı tanışdır. Ona görə çalışıram ki, heç kimi həvəsdən salmayım. Amma bu o demək deyil ki, mən kiminsə pis ifasına yaxşı deyirəm, əgər ifa xoşuma gəlmirsə, öz iradlarımı mütləq bildirirəm.

- Necə fikirləşirsiz, "Yeni ulduz-7"nin qalibi hansı iştirakçı olacaq?

- "Yeni ulduz-7"nin iştirakçılarının hamısı istedadlı gənclərdir. Amma istedadına görə xüsusilə seçilən, mənim fikrimcə, Azad Şabanov, Aygün Rəhimova və Çingiz Mustafayevdir. Məncə, Çingiz Mustafayev hər cəhətdən "Yeni ulduz" meyarlarına uyğun gəlir. Bu iştirakçı olduqca istedadlıdır və təpədən-dırnağa artist doğulub. Heç bir musiqi təhsili görməyən bu gənc hərdən elə bir ritm tutur ki, çox təəccüblənirəm. Soruşanda isə həmin notun adını da bilmir. Ona görə də hesab edirəm ki, əgər Çingiz öz üzərində işləsə, gələcəkdə mütləq səhnədə olacaq.

- Əslində "Yeni ulduz" meyarları nəyi tələb edir?

- Yeni ulduzda iştirak etmək üçün bu sahədə hansısa peşəkarlıq tələb olunmur. Sadəcə, iştirakçının güclü ritm hissiyatı, normal musiqi duyumu və xarici görünüşü olmalıdır. Doğrudur, artıq bu gün bir çox müsabiqələrdə, o cümlədən "Yeni ulduz"da boyun 175 santimetrdən uca olması şərtdir. Amma mən bunu düzgün hesab etmirəm. Çünki bu gün dünya səhnələrini fəth edən qısaboylu müğənnilər də az deyil.

- Bu gün ölkəmizdə çox ciddi şəkildə "Eurovision" beynəlxalq mahnı müsabiqəsinə hazırlıq gedir. Sizin fikrinizcə, nəyə görə bu gün "Eurovision"a göndəriləcək namizədlər arasında "Yeni ulduz"un iştirakçısı yoxdur?

- İlk seçim turunda "Yeni ulduz"un qalibi olan İlhamə Qasımova da iştirak etdi. Amma görünür, seçimi aparan münsiflər bu sahədə superprofessionallar olub və belə məsləhət biliblər. Çox güman ki, yaş məhdudiyyəti də olub. Amma mən İlhaməni yaxşı tanıdığım üçün hesab edirəm ki, o, Azərbaycanı "Eurovision"da layiqincə təmsil edə bilərdi.

525-ci qəzet.- 2008.- 26 yanvar.- S. 26.